Markaziy Osiyo: Hamkorlik tamoyillari va yangi imkoniyatlar

O‘zbekiston Prezidenti Shavkat Mirziyoyev “Markaziy Osiyo yangi davr ostonasida” maqolasida mintaqadagi hamkorlik tamoyillarini belgilab berdi. Bu haqda Zamin.uz xabar berdi.

Unga ko‘ra, mintaqaviy hamkorlik ixtiyoriylik, pragmatizm va real natijalarga yo‘naltirilgan bo‘lishi lozim. Prezident Markaziy Osiyo mamlakatlari o‘rtasidagi muloqot mintaqa barqarorligini ta’minlash uchun muhim ekanini ta’kidladi va bu yo‘nalishda hamkorlikni davom ettirish zarurligini qayd etdi.

Xavfsizlik sohasida Mirziyoyev maxsus xizmatlar, mudofaa va huquqni muhofaza qilish organlari rahbarlarining muntazam uchrashuvlarini tashkil etish taklifini ilgari surdi. Iqtisodiyot bo‘yicha esa ichki mintaqaviy savdoni rivojlantirish, chegaralarni kesib o‘tishni soddalashtirish va investitsiyalar uchun qulay shart-sharoitlar yaratish zarurligi aytildi.

Shuningdek, sanoat kooperatsiyasini rivojlantirish, mintaqaviy ta’minot zanjirlarini shakllantirish va chegara savdo zonalarini kengaytirish masalalariga e’tibor qaratildi. Davlat rahbari iqlim o‘zgarishiga qarshi kurash va suv resurslarini samarali boshqarish bo‘yicha mintaqaviy hamkorlikni kuchaytirish muhimligini ham ta’kidladi.

Prezidentning fikricha, ta’lim, ilm-fan, madaniyat, turizm va yoshlar dasturlarini rivojlantirish mintaqadagi o‘zaro anglashuvni mustahkamlashga xizmat qiladi. Bu esa umumiy qadriyatlar asosida mintaqaviy birdamlikni shakllantirishga yordam beradi.

Yakunda Shavkat Mirziyoyev Markaziy Osiyo davlatlarining xalqaro maydondagi muvofiqlashtirilgan harakatlari katta ahamiyatga ega ekanini qayd etdi. U “Markaziy Osiyo plyus” formatlari asosida asosiy hamkorlar bilan muloqotni rivojlantirish samarali ekanini alohida ta’kidladi.