Irem Xelvajiog‘lu turmush o‘rtog‘i bilan ajrashmoqda

Turkiya shou-biznesida yana bir kutilmagan hodisa yuz berdi. Bu haqda Zamin.uz xabar berdi.

Mashhur “So‘yla, Qora dengiz” serialida bosh rolni ijro etgan aktrisa Irem Xelvajiog‘lu turmush o‘rtog‘i, tadbirkor Ural Kaspar bilan ajrashishga qaror qilgani haqida turk ommaviy axborot vositalari xabar bermoqda. Ushbu qaror aktrisaning farzandi dunyoga kelganidan bir oy ham o‘tmay qabul qilingan.

Irem va Uralning munosabatlari uzoq yillardan beri murakkab bo‘lib kelgan. Ular bir necha bor ajralib, keyin yana yarashgan.

Hatto to‘ydan bir necha oy oldin ularning ajrashgani haqida xabarlar tarqalgan edi. Shunga qaramay, ularning 2024-yil oktyabr oyida oila qurishi ko‘pchilikni hayratga solgan edi.

Yaqinda esa Irem Sora ismli qiz farzandini dunyoga keltirdi. Ural Kaspar ijtimoiy tarmoqlarda bu voqeadan xursand ekanini bildirgan edi.

Biroq, Aksam nashrining ma’lumotiga ko‘ra, juftlik kelishuv asosida ajrashishga qaror qilgan. Ajrashish sabablari haqida ochiq ma’lumot berilmagan.

Iremning agenti ham, Uralning o‘zi ham bu borada izoh bermagan. Bundan tashqari, bir necha kun oldin ular ishtirok etgan avtohalokat haqida ham xabarlar tarqalgan.

Mototsikl ularning mashinasiga urilgan va Iremga tibbiy yordam ko‘rsatilgan, bir necha chok qo‘yilgan. Yaxshiyamki, jarohatlar og‘ir bo‘lmagan va oila shifoxonadan tezda chiqib ketgan.

Hozircha ajrashish jarayonining qachon boshlanishi va juftlikning kelgusidagi rejalari haqida aniq ma’lumot yo‘q. Voqealar rivoji ko‘pchilikning e’tiborida bo‘lib turibdi.