Volkswagen is completely abandoning the production of diesel engines
Germaniyaning jahonga mashhur Volkswagen konserni o‘zining ko‘p yillik tarixga ega va eng ommabop hisoblangan 2,0 litrli TDI dizel dvigatellaridan bosqichma-bosqich voz kechishini e’lon qildi. Bu haqda Zamin.uz xabar berdi.
Yevropa Ittifoqi hududida ekologik me’yorlarning keskin qat’iylashishi hamda kompaniyaning elektromobillar ishlab chiqarishga yo‘naltirilgan yangi strategiyasi ushbu afsonagy agregatning ishlab chiqarishdan olib tashlanishiga asosiy sabab bo‘ldi. Mazqar qaror nafaqat brend ishqibozlari, balki butun jahon avtomobil sanoati uchun muhim burilish nuqtasi bo‘lishi kutilmoqda.
Sanoat tahlilchilarining xabar berishicha, Volkswagen T-Roc krossoverining yangi avlodi brendning dizel yoqilg‘isidan butunlay voz kechgan ilk yengil avtomobili bo‘ladi. Buning o‘rniga model o‘z tarixida birinchi marta o‘zi quvvatlanuvchi gibrid kuch qurilmasi bilan jihozlanadi.
Kelajakda bunday texnologik o‘zgarishlar mashhur Volkswagen Golf modelini ham chetlab o‘tmaydi. Ushbu model ham yaqin yillarda dizel dvigatellari o‘rniga zamonaviy gibrid tizimlariga o‘tkazilishi rejalashtirilgan.
Kompaniyaning bunday keskin qadam tashlashiga Yevropada joriy etilayotgan Euro 7 standartlari va havoga chiqariladigan zaharli gazlar miqdorini kamaytirish bo‘yicha ortib borayotgan talablar sabab bo‘lmoqda. Zamonaviy dizel dvigatellarini ushbu qat’iy ekologik talablarga moslashtirish va ularni qayta sertifikatsiyadan o‘tkazish iqtisodiy jihatdan o‘zini oqlamay qoldi.
Shu sababli Volkswagen rahbariyati an’anaviy ichki yonuv dvigatellari va to‘liq elektr transport vositalari o‘rtasidagi oraliq bosqich sifatida gibrid texnologiyalarga asosiy e’tiborni qaratmoqda. EA288 oilasiga mansub 2,0 litrli TDI dvigateli uzoq yillar davomida Volkswagen guruhi tarkibidagi ko‘plab modellar uchun asosiy quvvat manbai bo‘lib xizmat qildi.
Biroq mutaxassislar ushbu dvigatelning ishlash jarayonida bir qator texnik muammolar kuzatilganini ham ta’kidlab o‘tishgan. Xususan, sovutish tizimidagi nosozliklar, antifriz suyuqligining oqishi hamda suv nasosi va termostat bilan bog‘liq kamchiliklar tez-tez uchrab turgan.
Shuningdek, ushbu dvigatellarda moy sarfining yuqoriligi kabi holatlar ham foydalanuvchilar tomonidan qayd etilgan. Shunga qaramay, kompaniya rahbariyati dizel dvigatellaridan voz kechish qarorini agregatning ishonchliligi bilan emas, balki faqatgina ekologik majburiyatlar va model qatorini elektrlashtirish rejasi bilan izohlamoqda.
O‘zbekiston bozorida ham Volkswagen brendining dizel modellari, ayniqsa krossoverlar va tijorat transporti o‘z o‘rniga ega. Biroq global tendensiya tez orada gibrid va elektr modellar ustunlik qilishini ko‘rsatmoqda.
Bu esa kelajakda mamlakatimiz yo‘llarida ham tejamkor va ekologik toza Volkswagen modellarining ko‘payishiga zamin yaratadi.
