"Звезда "Повелителя колец" раскрыла, что она вышла замуж тайно
Голливуднинг машҳур актёри, "Узуклар ҳукмдори" ва "Хоббит" фильмларининг юлдузи Элайджа Вуд ўз мухлисларини кутилмаган хабар билан ҳайратга солди. У Inside You подкастида ўзининг суҳбатдоши Метте-Мари Консведни "рафиқаим" деб атади. Бу эса уларнинг махфий равишда турмуш қурганига ишора қилди. Кейинчалик TMZ нашри кичик суриштирув ўтказиб, жупликнинг Лос-Анжелес округида расмий никоҳдан ўтгани ҳақидаги ҳужжатни аниқлади.
Шу пайтгача, актёрнинг расмий равишда уйлангани ҳақида расман маълумот берилмаган эди. Шунинг учун ҳам, уларнинг айнан қайси санада никоҳдан ўтгани ноаниқлигича қолмоқда. Бироқ, ижтимоий тармоқларда тарқалган миш-мишларга кўра, жуплик Янги йил арафасида Швецияда махфий маросим ўтказган. Инсайдерларнинг маълум қилишича, бу тўй маросими жуда камсонли меҳмонлар билан, ёпиқ форматда ўтган. Унда фақат келин ва куёвнинг энг яқин қариндошлари ҳамда дўстларидан иборат тахминан 80 киши қатнашган.
Элайджа Вуднинг шахсий ҳаёти ҳақида кўп маълумот тарқалмайди. У интервью ва ижтимоий тармоқларда оиласи ҳақида жуда кам гапиради. Шунинг учун ҳам унинг турмуш қургани ва фарзандлари борлиги кўпчилик учун кутилмаган хабар бўлди. Бироқ, 2023 йилда The Wall Street Journal нашрига берган интервьюсида актёр ўзининг иккинчи фарзанди борлигини ошкор қилган эди.
— Оиламизда 3 ёшли ўғлимиз ва 1,5 ёшли қизимиз бор. Қизим бизни эрта тонгдан уйғотади, — деб қайд этган эди Элайджа Вуд.
Эслатиб ўтамиз, Элайджа Вуд ва Метте-Мари Консведнинг муносабатлари ҳақидаги илк хабарлар 2017 йилда пайдо бўлган эди. Улар 2018 йилда биринчи марта омма олдида биргаликда пайдо бўлган. Шу вақтдан бери жуплик шахсий ҳаётларини оммадан максимал даражада яширишга ҳаракат қилган.
Актёр ва унинг рафиқаси шу пайтгача шахсий ҳаётларини кенг омма муҳокамасига олиб чиқмаган бўлсалар-да, мухлислари уларнинг бахтига тилакдошлик билдиришмоқда. Чунки Элайджа Вуд нафақат ажойиб актёр, балки самимий ва камтар инсон сифатида ҳам танилган шахсдир.
Nodirbek
