5G texnologiyasi haydovchisiz avtomobillar harakatida muammolarga duch kelishi mumkin
Simsiz aloqa texnologiyalari zamonaviy transport tizimlarini rivojlantirishda, xususan, yo‘llarda aqlli boshqaruv usullarini joriy etishda hal qiluvchi ahamiyatga ega. Bu haqda Zamin.uz xabar berdi.
Kelajakda haydovchisiz harakatlanadigan avtomobillarning o‘zaro tezkor ma’lumot almashishini ta’minlashda beshinchi avlod tarmoqlari, ya’ni 5G texnologiyasi asosiy poydevor bo‘lishi kutilmoqda. Ushbu yo‘nalishdagi yangiliklar va sohadagi o‘zgarishlar haqida xalqaro nashrlar muntazam ma’lumot berib bormoqda.
Biroq Shotlandiyaning Glazgo va Heriot-Vatt universitetlari tadqiqotchilari tomonidan o‘tkazilgan so‘nggi izlanishlar kutilmagan texnik muammolarni o‘rtaga chiqardi. Olingan natijalarga ko‘ra, hatto eng ilg‘or va yuqori tezlikdagi aloqa tizimlari ham muayyan sharoitlarda kutilmagan uzilishlarga duch kelishi mumkinligi aniqlandi.
Bu esa to‘liq avtomatlashtirilgan transport vositalari xavfsizligi borasida yangi savollarni tug‘dirmoqda. Tadqiqot jarayonida ma’lum bo‘lishicha, yo‘llardagi piyodalar, boshqa harakatlanuvchi transport vositalari va turli obektlar simsiz signallarni bir necha soniyaga to‘sib qo‘yishi mumkin.
Bunday qisqa muddatli uzilishlar haydovchisiz boshqariladigan avtomobillarning o‘zaro aloqasiga salbiy ta’sir ko‘rsatadi. Signalning yo‘qolishi tizimning favqulodda holatlarda tezkor qaror qabul qilish qobiliyatini pasaytirib, jiddiy xavf-hatarlarni keltirib chiqarishi ehtimoldan xoli emas.
Mutaxassislar ayniqsa transport oqimi yuqori bo‘lgan gavjum ko‘chalarda signal bloklanishi tizim barqarorligiga putur yetkazishidan xavotir bildirmoqdalar. Kelajakda avtonom transport vositalarini keng miqyosda joriy etish va yo‘l harakati xavfsizligini to‘liq ta’minlash uchun mazkur texnik kamchiliklarni bartaraf etish talab etiladi.
Hozirda muhandislar va olimlar aloqa sifatini har qanday sharoitda ham barqaror saqlab qolish imkonini beruvchi qo‘shimcha yechimlar ustida ish olib bormoqdalar. Zero, inson hayoti bilan bog‘liq bo‘lgan texnologiyalarda hatto bir soniyalik xatolikka ham yo‘l qo‘yib bo‘lmaydi.
