«Xyunday» kompaniyasi ilk bor ramali yo'ltanlamas modelini taqdim etadi
Janubiy Koreyaning Hyundai kompaniyasi avtomobil bozorida tub burilish yasash arafasida turibdi. Bu haqda One.uz xabar beradi.
Maʼlumotlarga koʻra, brend oʻz tarixida ilk bor haqiqiy ramali yoʻltanlamas — Hyundai Boulder modelini taqdim etishga tayyorgarlik koʻrmoqda. Ushbu yangi avtomobil dunyoga mashhur Ford Bronco, Jeep Wrangler va Toyota 4Runner kabi modellar bilan raqobatlashishi kutilmoqda.
Hindistonda roʻyxatdan oʻtkazilgan patent tasvirlari orqali yangi mashinaning tashqi koʻrinishi ommaga maʼlum boʻldi. Bu qadam kompaniyaning nafaqat shahar krossoverlari, balki murakkab yoʻl sharoitlariga moʻljallangan texnikalar segmentida ham oʻz oʻrnini mustahkamlash niyatida ekanini koʻrsatadi.
Tashqi koʻrinish va zamonaviy jihozlar Patent hujjatlarida aks etgan seriyali model avvalroq Nyu-York avtosalonida namoyish etilgan konseptual nusxaga juda oʻxshash ekani eʼtiborga molik. Hyundai Boulder oʻzining keskin va agressiv qiyofasi bilan ajralib turadi.
Avtomobilning deyarli tik tushgan old qismi, vertikal chiroqlarga ega ixcham faralari hamda baquvvat himoya qatlamlari uning jiddiy imkoniyatlaridan darak beradi. Keng kvadrat shaklidagi gʻildirak arkalari va orqa eshikka oʻrnatilgan zaxira gʻildiragi haqiqiy yoʻltanlamaslarga xos boʻlgan uslubni namoyon etadi.
Avtomobil saloni ham zamonaviy texnologiyalar bilan boyitiladi. Ichki qismda yoʻltanlamas rejimlarini boshqarish uchun qulay jismoniy tugmalar saqlab qolinadi.
Shu bilan birga, Android Automotive tizimi asosida ishlaydigan yangi multimedia majmuasi oʻrnatilishi rejalashtirilgan. Mazkur tizim navigatsiya, turli ilovalar va dasturlarni masofadan yangilash imkoniyatini taqdim etadi.
Shuningdek, haydovchilarga qulaylik yaratish maqsadida maxsus ovozli yordamchi ham joriy etilishi kutilmoqda. Texnik imkoniyatlar va dvigatellar Muhandislik nuqtai nazaridan Hyundai Boulder toʻliq uzatmali tizim, differensial blokirovkalari va pasaytirilgan uzatmalar qutisi bilan taʼminlanadi.
Avtomobilning mustahkam ramali asosga ega boʻlishi uning ogʻir sharoitlarda chidamliligini kafolatlaydi. Hatto baʼzi manbalarda mashinaning oʻz oʻrnida burilish kabi murakkab funksiyalarga ega boʻlishi haqida taxminlar ilgari surilmoqda.
Bu esa uni raqobatchilari orasida texnik jihatdan ustun qilishi mumkin. Dvigatellar qatoriga kelsak, ishlab chiqaruvchi bir nechta variantni koʻrib chiqmoqda.
Bular orasida 330 ot kuchiga ega gibrid tizim, 400 ot kuchiga yaqin quvvatli quvvatlanuvchi gibrid hamda toʻliq elektr versiyalari mavjud. Ayrim hududlar uchun esa 2,2 litrli turbodizel dvigateli taklif etilishi ehtimoldan xoli emas.
Hozircha platforma borasidagi yakuniy maʼlumotlar ochiqlanmagan boʻlsa-da, yangi model Hyundai brendining yoʻltanlamaslar olamidagi yangi davrini boshlab berishi shubhasizdir.
