Indoneziya Prezidentining mushugi davlat himoyasida
Indoneziya Prezidenti Prabovo Subiantoning shaxsiy mushugi Bobbi Kertanegar endi davlat darajasida himoya qilinadi. Bu haqida Zamin.uz xabar berdi.
Jakartadagi prezident qarorgohida yashovchi Bobbi uchun maxsus xavfsizlik xizmati tashkil etildi. Endilikda u oddiy uy hayvoni emas, balki prezident mulki sifatida qo‘riqlanadi.
Bobbi to‘qqiz yil oldin Prabovo Subianto tomonidan asrab olingan va hozirda prezidentning doimiy hamrohi hisoblanadi. Odatda davlat rahbarlari uy hayvonlarini jamoatchilikdan yashiradi, ammo Bobbi bu odatni o‘zgartirdi.
U qarorgohning doimiy rezidenti bo‘lish bilan birga ijtimoiy tarmoqlarda ham mashhurlikka erishdi. Uning Instagram va TikTokdagi sahifalarini millionlab insonlar kuzatadi.
Bobbining videolari ko‘pchilikda iliq taassurot qoldiradi va xorijdagi mushuk ishqibozlarining ham qiziqishini uyg‘otmoqda. Davlat tomonidan maxsus qaror qabul qilingandan so‘ng, Bobbining kunlik harakatlari xavfsizlik xodimlari tomonidan doimiy nazoratga olindi.
Uning oziqlanishi, dam olishi va yurish marshrutlari maxsus protokollarga muvofiq tashkil qilindi. Qarorgoh atrofida qo‘shimcha kuzatuv kameralar o‘rnatildi va xavfsizlik rejimi yanada kuchaytirildi.
Bu yangilik Indoneziya jamoatchiligi orasida turli fikr-mulohazalarga sabab bo‘ldi. Ba’zilar buni ajablanarli holat deb hisoblasa, boshqalar Prezidentning tabiatga va hayvonlarga bo‘lgan samimiy munosabati sifatida qabul qilmoqda.
Bobbiga davlat darajasida qo‘riqchi ajratilishi mamlakat tarixida birinchi marta ro‘y bermoqda. Endi Bobbi nafaqat himoyalangan jonivor, balki Indoneziyaning madaniy ramziga aylanishi kutilmoqda.
