Buyuk Britaniyada qizlar uchun yubka taqiqlandi
Buyuk Britaniyada ba’zi davlat maktablari 2025–2026 o‘quv yilidan boshlab qizlar uchun yubka kiyishni taqiqlashga qaror qildi. Bu haqida Zamin.uz xabar berdi.
Yangi tartibga ko‘ra, barcha o‘quvchilar uchun yagona maktab formasi sifatida shim va formali ustki kiyim belgilandi. Ushbu o‘zgarish ko‘plab ota-onalar tomonidan keskin tanqid qilindi va norozilikka sabab bo‘ldi.
Ta’lim vazirligi bu qarorning asosiy maqsadi ota-onalarning ortiqcha xarajatlarini kamaytirish ekanini ma’lum qildi. Vazirlik vakillarining ta’kidlashicha, brendli kiyimlar o‘rniga oddiy va hamma uchun teng narxdagi liboslar tavsiya qilinmoqda.
Maktablar o‘z mustaqil qarorini qabul qilish huquqiga ega bo‘lib, bu majburiy talab emas. Shim kiyish qizlar uchun qulay va ularning harakat erkinligini cheklamaydi, deyiladi rasmiy bayonotda.
Bu yangilik gender tengligini ta’minlash maqsadida joriy etilgani aytilmoqda. Yubkadan voz kechish orqali o‘quvchilar orasidagi farqlarni kamaytirish va tenglikni oshirish ko‘zda tutilgan.
Biroq, ko‘plab ota-onalar bu qarorni noto‘g‘ri deb hisoblaydi va maktab formasi qizlarning shaxsiy tanloviga aralashmasligi kerak, degan fikrni bildiradi. Hozirda ayrim maktablar yangi tartibni joriy qilishdan bosh tortgan.
Shuning uchun Buyuk Britaniya bo‘ylab bu masalaga turlicha yondashuvlar mavjud bo‘lishi kutilmoqda. Ushbu mavzu jamoatchilik orasida keng muhokama qilinmoqda.
