Rossiyada onlayn kinolarni qat’iy nazoratga oladilar
Rossiyada onlayn kinoteatrlar va yirik ijtimoiy tarmoqlarga yangi qonuniy cheklovlar joriy etilishi rejalashtirilmoqda. Bu haqida Zamin.uz xabar berdi.
Davlat Dumasining axborot siyosati bo‘yicha qo‘mitasi mamlakatning an’anaviy ma’naviy-axloqiy qadriyatlarini kamsituvchi filmlarni bloklash majburiyatini onlayn platformalarga yuklashni qo‘llab-quvvatladi. Bu haqda Pravilamag nashri ma’lumot berdi.
Yangi tartibga ko‘ra, kunlik foydalanuvchilari 100 mingdan oshadigan saytlar, jumladan onlayn kinoteatrlar, Madaniyat vazirligi tomonidan qadriyatlarni kamsituvchi deb topilgan yoki prokat guvohnomasidan mahrum etilgan filmlarni bir sutka ichida o‘z platformalaridan olib tashlashi shart bo‘ladi. Agar talab bajarilmasa, Rossiya aloqa va axborot nazorati organi Roskomnadzor aralashib, platformalarga nisbatan tegishli choralar ko‘rishi mumkin.
Shuningdek, 500 mingdan ortiq foydalanuvchiga ega ijtimoiy tarmoqlar ham ushbu qonun doirasida javobgar hisoblanadi. Agar foydalanuvchilar taqiqlangan kontentni joylashtirsa, platformalar ushbu kontentni o‘chirishi lozim bo‘ladi.
Yangi qonun qabul qilinsa, Madaniyat vazirligi prokat guvohnomalarini bekor qilish yoki istalgan vaqtda o‘zgartirish kiritish huquqiga ega bo‘ladi. Bu o‘zgarishlar, masalan, filmga qarshi yosh chegaralarini kuchaytirish ko‘rinishida bo‘lishi mumkin.
Qonun loyihasiga ko‘ra, Rossiyada prokatga chiqish huquqini olgan filmlar an’anaviy qadriyatlarni hurmat qilishi shart. Ushbu tamoyillarga zid bo‘lgan asarlar ruxsatdan mahrum etiladi.
Qonun loyihasi 24 iyun kuni Davlat Dumasida birinchi o‘qishda ma’qullangan, hozircha ikkinchi o‘qish sanasi aniqlanmagan. Hujjat kuchga kirgach, 2026 yil 1 martdan boshlab amal qiladi.
Tuzatishlarning muallifi Davlat Dumasining axborot siyosati bo‘yicha qo‘mitasi raisining birinchi o‘rinbosari Anton Gorelkindir.
