Britaniyada kiberhujum 700 ishchini ishsiz qoldirdi

Britaniyada kiberhujumlar ko‘plab kompaniyalar faoliyatini to‘xtatib, minglab odamlarning ishsiz qolishiga sabab bo‘lmoqda. Bu haqida Zamin.uz xabar berdi.

Shulardan biri – Nortgemptonshirda joylashgan va 158 yillik tarixga ega KNP logistika kompaniyasi. Ushbu kompaniya kiberhujum natijasida faoliyatini davom ettira olmasdan, 700 nafar xodim ishidan ayrildi.

Mutaxassislarning ma’lumotlariga ko‘ra, hujum «Akira» nomli hakerlar guruhi tomonidan amalga oshirilgan. Ular kompaniya xodimlaridan birining oddiy va oson topiladigan parolidan foydalanib, ichki tizimga kirishga muvaffaq bo‘lgan.

Keyin barcha ma’lumotlar shifrlanib, ichki dasturlar ishlamay qoldi. Hakerlar ma’lumotlarni tiklash evaziga katta miqdorda tovon puli talab qilishgan.

Xatlarda hakerlar konstruktiv muloqotni boshlashni taklif qilgan. Biroq, KNP kompaniyasida tovon puli uchun zarur mablag‘ mavjud emas edi.

Natijada ma’lumotlar tiklanmadi va kompaniya bankrot deb e’lon qilindi. Bu esa 700 nafar ishchining ishsiz qolishiga olib keldi.

So‘nggi yilda Buyuk Britaniyada 19 mingga yaqin kiberhujum qayd etilgan. Odatda, hakerlar o‘rtacha 4-5 million funt sterling miqdorida tovon puli talab qiladi.

Tadqiqotlar shuni ko‘rsatadiki, britan kompaniyalarining uchdan biri kiberhujumdan so‘ng tovon to‘lashga majbur bo‘lgan. Fevral oyida shunga o‘xshash hujum kriptovalyuta birjasi Bybitga qilingan.

Hakerlar Ethereum kriptovalyutasini saqlovchi raqamli hamyonni nazorat qilib, 1,5 milliard dollar miqdorida mablag‘ni o‘g‘irlashgan. Ushbu voqealar kiberxavfsizlik sohasidagi muhim muammolarni ko‘rsatmoqda va kompaniyalarni ehtiyot choralarini kuchaytirishga undamoqda.