Ukraina Prezidenti Vladimir Zelenskiy tomonidan imzolangan yangi qonun mamlakatda keng noroziliklarga sabab bo‘ldi. Bu haqida Zamin.uz xabar berdi.
Ushbu qonun korrupsiyaga qarshi kurashuvchi muhim davlat organlari — Milliy Korrupsiyaga Qarshi Byuro (NABU) va Maxsus Korrupsiyaga Qarshi Prokuratura (SAPO) mustaqilligini cheklab, ularni Bosh prokuror nazoratiga o‘tkazishni nazarda tutadi. Bu o‘zgarishlar Ukraina fuqarolari va xalqaro hamjamiyat, xususan Yevropa Ittifoqi hamda G7 davlatlari tomonidan keskin tanqid qilindi.
Kiyev, Lvov, Dnipro va Odessa shaharlarida yuzlab odamlar ishtirokida norozilik namoyishlari bo‘lib o‘tdi. Bu namoyishlar Rossiya bosqini boshlanganidan beri eng yiriklaridan biri sifatida qayd etilmoqda.
Namoyishchilar “Biz Yevropani tanlaganmiz, avtoritarizmni emas” va “Otam shu narsa uchun hayotini fido qilmagan” degan shiorlarni ko‘tarib chiqishdi. Prezident Zelenskiy qonunni himoya qilib, korrupsiyaga qarshi organlarning faoliyati samarasiz ekanini ta’kidladi.
Unga ko‘ra, yirik moliyaviy jinoyatlar yuzasidan ochilgan ishlar yillar davomida hal qilinmay, samarali natija bermay kelgan. Zelenskiy Bosh prokuratura nazoratini kuchaytirish orqali jinoiy javobgarlikni ta’minlash va tizimni “Rossiya ta’siridan” xoli qilishni maqsad qilganini bildirdi.
Xalqaro hamjamiyat ushbu qonunni qattiq tanqid qildi. Yevropa Komissiyasi vakili Giyom Mersye bu o‘zgarishlar Yevropa Ittifoqi bilan hamkorlikdagi korrupsiyaga qarshi talablarni zaiflashtirishi mumkinligini ta’kidladi.
Yevropa kengayish komissari Marta Kos esa NABU va SAPO mustaqilligining yo‘qolishini “jiddiy orqaga qadam” deb baholadi. U bu tashkilotlarning Yevropa Ittifoqiga a’zolik yo‘lida muhim tamoyil ekanligini eslatdi.
Shuningdek, G7 davlatlari elchilari Ukraina rahbariyati bilan qonun yuzasidan alohida muzokaralar o‘tkazishni rejalashtirayotgani ma’lum qilindi.
