Xitoy dvigatellari Rossiyaga sanksiyalarni chetlab o‘tmoqda
Reuters axborot agentligi va Yevropa xavfsizlik xodimlarining ma’lumotlariga ko‘ra, Xitoyda ishlab chiqarilgan dvigatellar G‘arb sanksiyalarini chetlab o‘tish uchun “sanoat sovutgichlari” nomi ostida Rossiyaga yuborilmoqda. Bu haqida Zamin.uz xabar berdi.
Ushbu dvigatellar Rossiyaning davlatga qarashli IEMZ Kupol kompaniyasiga yetkazilib, Ukraina hududiga hujum qilishda foydalanilayotgan Garpiya-A1 dronlariga o‘rnatilmoqda. Garpiya-A1 uzoq masofalarga uchuvchi hujumchi dron bo‘lib, Ukraina harbiy va fuqarolik obyektlariga zarba berishda faol qo‘llanilmoqda.
Reuters ko‘rgan ichki hujjatlarga ko‘ra, Kupol kompaniyasi 2025-yil davomida 6 mingdan ortiq dron ishlab chiqarish bo‘yicha Rossiya Mudofaa vazirligi bilan shartnoma imzolagan. Aprel oyigacha esa 1 500 dan ko‘proq dron yetkazib berilgan.
Ukraina harbiy razvedkasi ma’lumotlariga ko‘ra, har oy o‘rtacha 500 ga yaqin dron faol ishlatilmoqda. Oldin Kupol kompaniyasi Xiamen Limbach Aviation Engine Co.
tomonidan ishlab chiqarilgan L550E dvigatellaridan foydalangan. Bu kompaniya 2024-yil oktyabr oyida Yevropa Ittifoqi va AQSh tomonidan sanksiyaga uchragan.
Shundan so‘ng, yangi Xitoy firmasi – Beijing Xichao International Technology and Trade – dron dvigatellarini yetkazishni boshlagan. Xitoy Tashqi ishlar vazirligi bu holat haqida ma’lumotga ega emasligini bildirgan va barcha ikki maqsadli mahsulotlar eksporti Xitoy qonunlari hamda xalqaro majburiyatlarga muvofiq nazorat qilinishini ta’kidlagan.
Yevropa Komissiyasi Prezidenti Ursula fon der Leyyen ertaga Xitoyga safar qilib, Xitoy rahbari Si Szinpin va Bosh vazir Li Syan bilan uchrashadi. Uchrashuvda Pekinning Rossiyaga texnologik yordam ko‘rsatishi bilan bog‘liq xavotirlar muhokama qilinishi kutilmoqda.
Bu holat xalqaro diplomatik munosabatlarda keskinlikni kuchaytirishi mumkin.
