Union Pacific va Norfolk Southern kompaniyalari birlashmoqda

Amerikaning eng yirik temiryo‘l yuk tashuvchi kompaniyalaridan bo‘lgan Union Pacific va Norfolk Southern kompaniyalari mamlakat bo‘ylab Sharqdan G‘arbgacha yagona milliy temiryo‘l tizimini yaratish maqsadida birlashish bo‘yicha muzokaralarning so‘nggi bosqichiga yetganini ma’lum qildi. Bu haqida Zamin.uz xabar berdi.

Agar mazkur birlashuv amalga oshsa, u so‘nggi o‘n yillikdagi eng yirik temiryo‘l ittifoqi sifatida tarixga kiradi. Bu ikki kompaniya AQShdagi oltita yirik yuk tashuvchi temiryo‘l kompaniyalarining eng kattasi va eng kichigi hisoblanadi.

Birlashuvdan kutilayotgan asosiy foyda samaradorlikni oshirishga qaratilgan. Bu esa yuk tashish tezligini yaxshilash, logistika xarajatlarini kamaytirish hamda xizmat ko‘rsatish sifatini oshirish imkonini beradi.

Shu bilan birga, Union Pacific kompaniyasi so‘nggi chorak yakunlari bo‘yicha moliyaviy ko‘rsatkichlarini e’lon qildi. Kompaniyaning sof foydasi 1,8 milliard dollarni tashkil etib, har bir aksiyaga to‘g‘ri keladigan foyda 3,03 dollarni tashkil etdi.

Bu ko‘rsatkich investorlar kutganidan yuqori bo‘ldi. Kompaniyaning daromadi esa 6,2 milliard dollarga yetib, o‘tgan yilga nisbatan 2 foizga o‘sdi.

Ushbu ma’lumotlar kompaniyaning moliyaviy barqarorligini va kelajakdagi rivojlanish istiqbollarini ko‘rsatmoqda. Birlashuv amalga oshgach, temiryo‘l sohasida yangi imkoniyatlar ochilishi kutilmoqda.