So‘nggi paytlarda ijtimoiy tarmoqlarda qizlar orasida mashhur bo‘lib borayotgan masalalardan biri Darry Ring brendining halqasi haqida. Bu haqida Zamin.uz xabar berdi.
Bu halqa Cartier yoki Tiffany kabi taniqli brendlar emas, balki xitoylik Darry Ring brendi mahsuloti bo‘lib, ko‘plab yoshlar uchun orzu ramziga aylangan. Nima uchun aynan Darry Ring halqasi shunchalik mashhur?
Sababi uning o‘ziga xos falsafasida yotadi. Darry Ring halqasi – bu oddiy zargarlik buyumidan ko‘ra ko‘proq ma’noga ega.
U «bir inson, bir muhabbat, bir umr» tamoyilini ifodalaydi. Halqani xarid qilmoqchi bo‘lgan shaxs o‘z shaxsiy ma’lumotlarini taqdim etishi va «Haqiqiy muhabbat kelishuvi»ni imzolashi shart.
Ushbu kelishuvga muvofiq, har bir inson umrida faqat bir marta bunday halqani xarid qilishi mumkin. Bu mahsulot ortida chuqur muhabbat hikoyasi yotadi.
Brend asoschilari Toni Chjan va Vendi Lu o‘zlarining shaxsiy muhabbatlaridan ilhomlanib, to‘y va nikoh munosabatlariga jiddiy yondashishni targ‘ib qiladilar. Ular uchun halqa nafaqat bezak, balki muhabbat va mas’uliyat ramzidir.
Ijtimoiy tarmoqlarda Darry Ring halqalari bilan bog‘liq videolar tez tarqalmoqda. Ko‘plab qizlar bu halqani orzu qilib, yigitlaridan aynan shunday halqa olishni istashmoqda.
Zamonaviy dunyoda qadriyatlar o‘zgarayotgan bo‘lsa-da, inson qalbida muhabbat va sadoqat ahamiyatini yo‘qotmayapti. Darry Ring brendi esa yoshlar orasida sevgi uchun javobgarlikni oshirishga xizmat qilmoqda.
Shu sababli, bu halqalar nafaqat modadan kelib chiqadigan buyum, balki chin dildan berilgan va qabul qilingan muhabbatning ramzi sifatida qadrlanmoqda.
