2024 yil dekabr oyida sodir bo‘lgan AZAL aviakompaniyasiga tegishli havo hodisasi yuzasidan yangi ma’lumotlar paydo bo‘ldi. Bu haqida Zamin.uz xabar berdi.
Ozarbayjonning Minval Politika nashri 24 iyul kuni samolyot o‘qqa tutilgan paytda navbatchi bo‘lgan barcha rossiyalik harbiy xizmatchilarning ismlarini e’lon qildi. Biroq, nashr manbani oshkor etmagan va hozircha boshqa mustaqil manbalar bu ma’lumotlarni tasdiqlamagan.
Nashrga ko‘ra, ushbu hodisa vaqtida navbatchi bo‘lgan harbiylar quyidagilar: 51-havo mudofaa diviziyasining katta navigatori kapitan Dmitriy Pudovkin, Janubiy harbiy okrug shtabining tezkor navbatchisi podpolkovnik Vladimir Yanovskiy hamda 4-havo mudofaa armiyasi qo‘mondonlik punktidagi polkovnik Gennadiy Yeremenko. Ular raketa uchirilishi vaqtida navbatda bo‘lgan.
Rossiyadagi Astra Telegram kanali ham Minval tomonidan e’lon qilingan ma’lumotlarni tasdiqladi. Kanal ushbu harbiy shaxslarning haqiqatan ham armiya tizimida xizmat qilganini sirtdan olingan ma’lumotlar asosida ma’lum qildi.
Shuningdek, Minval nashri 22 iyul kuni 51-havo mudofaa diviziyasi qo‘mondoni general-mayor Aleksandr Tolopilo havo nishoniga zarba berish bo‘yicha to‘g‘ridan to‘g‘ri buyruq berganini xabar qildi. Bu ma’lumot podpolkovnik Nikolay Orlyanskiyning ichki xizmat tekshiruvi davomida ma’lum bo‘lgan.
Tekshiruvda u Tolopilodan buyruq olgani va keyinchalik kapitan Pudovkinga nishonni yo‘q qilish bo‘yicha ko‘rsatma bergani aniqlangan.
