Yevropol XSS.is forum ma’murini Ukrainada qo‘lga oldi
Yevropol Fransiya politsiyasi bilan hamkorlikda Ukrainada faoliyat yuritayotgan rus tilidagi XSS.is xakerlik forumining ma’murini qo‘lga oldi. Bu haqida Zamin.uz xabar berdi.
2013 yildan beri faol bo‘lgan XSS.is anonim xakerlar orasida eng muhim resurslardan biri hisoblanadi va 50 mingdan ortiq foydalanuvchiga ega edi. Ushbu forum orqali xakerlar xakerlik vositalari, o‘g‘irlangan ma’lumotlar hamda noqonuniy xizmatlarni sotish bilan shug‘ullangan.
Yevropol bayonotida forum global kiberjinoyatchilikka katta ta’sir ko‘rsatgani ta’kidlangan. Fransiya tomonidan 2021 yilda boshlangan uzoq muddatli tergov Yevropa Ittifoqi bilan yaqindan hamkorlikda olib borildi.
Kiyevda forum ma’muri sifatida faoliyat yuritgan shaxs qo‘lga olindi. Yevropol ma’lumotlariga ko‘ra, ushbu shaxs jinoiy faoliyatni tashkil etishda muhim rol o‘ynagan, jinoyatchilar o‘rtasidagi kelishmovchiliklarni hal qilish va bitimlarning xavfsizligini ta’minlash uchun vositachilik qilgan.
Bundan tashqari, u kiberjinoyatchilar uchun maxsus onlayn muloqot xizmatini boshqarganligi ham taxmin qilinmoqda. Bu qo‘lga olish global kiberxavfsizlikni ta’minlashda muhim qadam bo‘lib, kiberjinoyatchilikka qarshi muvaffaqiyatli kurashning namunasidir.
