Rossiyada 18 yoshli yigitlar urushda halok bo‘lmoqda
Rossiya prezidenti Vladimir Putin Ukrainadagi harbiy harakatlarda 18 yoshli yigitlar qatnashmasligini bir necha bor ta’kidlagan. Bu haqida Zamin.uz xabar berdi.
Biroq BBC tomonidan e’lon qilingan ma’lumotlarga ko‘ra, so‘nggi ikki yil ichida kamida 245 nafar 18 yoshli maktab bitiruvchisi Ukrainadagi frontda halok bo‘lgan. 2023-yil aprel oyidan boshlab Rossiyada maktabni tugatgan o‘smirlar harbiy xizmatga to‘g‘ridan-to‘g‘ri shartnoma asosida kirish imkoniga ega bo‘ldi.
Ilgari kamida uch oy harbiy xizmat o‘tash majburiy bo‘lgan bo‘lsa, endi bu talab bekor qilindi. Ko‘plab yigitlar, ayniqsa iqtisodiy jihatdan qiyin hududlarda yashovchilar, bu imkoniyatni yaxshi ish sifatida qabul qilmoqda.
Ular moliyaviy rag‘batlar va vatanparvarlik targ‘iboti ta’sirida armiya safiga qo‘shilmoqda. Shunday yigitlardan biri Aleksandr Petlinskiy edi.
U 18 yoshga to‘lganidan ikki hafta o‘tib shartnoma imzoladi va 20 kundan so‘ng Ukrainadagi jang maydonida halok bo‘ldi. Petlinskiyning xolasi aytishicha, u aslida shifokor bo‘lishni orzu qilgan va tibbiyot kollejiga hujjat topshirgan edi.
Ammo urush boshlangach, frontga ketishni ham istay boshlagan. 2024-yil sentabr oyidan boshlab yuqori sinf o‘quvchilari uchun “Vatanga mudofaa asoslari” nomli yangi fan joriy etildi.
Bu fanda bolalar avtomat, granata va harbiy taktika bo‘yicha bilim olishmoqda. Askarlar maktablarga kelib, o‘z jangovar tajribalari bilan o‘rtoqlashmoqda.
Shuningdek, bolalar frontdagi askarlarga xat va suratlar orqali ruhiy yordam ko‘rsatishga chaqirilmoqda. Sibirda tug‘ilgan Vitaliy Ivanov texnikumda mexaniklikni o‘rganayotgan edi.
Keyinchalik u o‘qishni tashlab, politsiya bilan muammo yuzaga kelgach, armiyaga qo‘shildi. Vitaliy ham fevral oyida frontga yuborildi va halok bo‘ldi.
Onasi Anna uning urushga ketayotgan kuni telefon orqali xayrlashganini aytadi: “Shimoliy harbiy okrugga ketayapman”, degan. O‘sha kun uning birinchi va oxirgi jangi bo‘ldi.
BBC hisob-kitoblariga ko‘ra, 2023-yil aprelidan 2025-yil iyulgacha kamida 245 nafar 18 yoshli yigit urushda halok bo‘lgan. Umuman olganda, 18 dan 20 yoshgacha bo‘lgan yosh askarlar orasida kamida 2812 nafarining o‘limi qayd etilgan.
Bu raqamlar yoshlar orasida urushning qanchalik og‘ir oqibatlarga olib kelayotganini ko‘rsatadi.
