Allianz Shimoliy Amerikada ma’lumot o‘g‘irlandi
Germaniyaning sug‘urta sohasidagi yirik kompaniyalaridan biri bo‘lgan Allianz o‘zining Shimoliy Amerikadagi bo‘linmasi “Allianz Life Insurance Company of North America” mijozlarining ko‘plab shaxsiy ma’lumotlari kiberhujum natijasida o‘g‘irlangani haqida rasmiy bayonot berdi. Bu haqida Zamin.uz xabar berdi.
Kompaniya 2025-yil 16-iyul kuni noma’lum kiberjinoyatchilar uchinchi tomonning bulut texnologiyasiga asoslangan mijozlar bilan ishlash tizimiga noqonuniy kirib, ma’lumotlarni qo‘lga kiritganini ma’lum qildi. Bayonotda xakerlar mijozlar, moliyaviy maslahatchilar va ba’zi xodimlarga oid shaxsiy identifikatsiyalovchi ma’lumotlarni olishga muvaffaq bo‘lgani ta’kidlandi.
Bu hujum ijtimoiy muhandislik usuli orqali amalga oshirilgan. Ijtimoiy muhandislik – bu texnologik vositalardan ko‘ra inson psixologiyasiga asoslangan usul bo‘lib, huquqbuzarlar o‘zlarini ishonchli tashkilot vakili yoki tanish sifatida ko‘rsatib, foydalanuvchilardan maxfiy ma’lumotlarni so‘rashadi.
Allianz kompaniyasi mijozlarini ehtiyotkorlikka chaqirib, shubhali murojaatlarga e’tibor berishni tavsiya qilmoqda. Shu bilan birga, kompaniya xavfsizlik choralarini kuchaytirish va zararlarni bartaraf etish bo‘yicha ishlarni davom ettirmoqda.
Mijozlar shaxsiy ma’lumotlarining himoyasi kompaniya uchun ustuvor vazifa ekanligi ta’kidlanmoqda. Kiberhujumlarga qarshi kurashda har bir foydalanuvchi ehtiyotkor bo‘lishi zarur.
