Mushuk 150 dan ortiq buyumni uyga olib keldi

Yangi Zelandiyada yashovchi Xelen Nort ismli ayol so‘nggi to‘qqiz oy ichida mushugi uyga taxminan 150 ta o‘g‘irlangan buyumni olib kelganini ma’lum qildi. Bu haqida Zamin.uz xabar berdi.

Bu holat mahalliy ommaviy axborot vositalarida keng yoritildi. Xelenning aytishicha, Leonardo da Pinchi laqabli mushuk har kuni uyga yangi “topilma” bilan qaytadi.

Qiziq tomoni shundaki, mushuk bu buyumlarni faqat uyga olib kelib, yerga tashlaydi va keyin o‘z yo‘lida ketaveradi. Eng ko‘p o‘g‘irlaydigan narsalari ichki kiyim va paypoqlar ekan.

Shuningdek, u qimmatbaho maykalar, yangi kiyimlar, yumshoq o‘yinchoqlar, bog‘ uchun qo‘lqoplar, sport shortiklari, qalpoqlar kabi turli buyumlarni ham olib keladi. Hatto bir kuni Leonardo uyga 1,5 metr uzunlikdagi yasama ilonni ham olib kelgan.

Mushuk uni ikki marta uyga olib kelgan va bu o‘yinchoq unga juda yoqqanligi aniq. Xelen Nort hozirda mahalliy ijtimoiy tarmoq guruhlari orqali qo‘shnilarga tegishli buyumlarni qaytarishga harakat qilmoqda.

Qo‘shnilar mushukning bu odatiga yumshoq munosabatda bo‘lib, bu holat ko‘pchilikda tabassum uyg‘otmoqda. Mushukning o‘g‘irlangan buyumlarni uyga olib kelishi mahalliy aholining kundalik hayotiga o‘ziga xos rang bag‘ishlamoqda.