Yaponiyada aholiga qo‘shimcha yordam va emotsional qo‘llab-quvvatlash maqsadida “OK Obaa chan” deb nomlangan noyob xizmat ishga tushirildi. Bu haqida Zamin.uz xabar berdi.
Ushbu loyiha doirasida 60 yoshdan oshgan buvilarni soatiga 3300 iyena, ya’ni taxminan 22 dollar evaziga ijaraga olish mumkin. Servisda yoshlari 60 dan 94 yoshgacha bo‘lgan qariyalar ro‘yxatda turibdi.
Mijozlar o‘z ehtiyojlariga qarab buvilarni tanlab, ularning xizmatlaridan foydalanish imkoniga ega. Ijara uchun yollangan buvilar uy ishlarida yordam beradi, mazali taom tayyorlashni o‘rgatadi, shuningdek, samimiy suhbatlar qurib, ijobiy muhit yaratadi.
Ko‘pincha yolg‘iz yashovchi yoki oilaviy parvarishga muhtoj insonlar ushbu xizmat orqali kattalarning mehr-muruvvatidan bahramand bo‘ladi. Bundan tashqari, xizmat yoshlar va bolalarga hayot tajribasi va ma’naviy yordam ko‘rsatishga ham qaratilgan.
Ushbu tashabbus jamoatchilik orasida turlicha qarashlarga sabab bo‘lmoqda. Ba’zilar bu xizmat yoshi kattalar uchun yangi imkoniyat va ijtimoiy faollik manbai ekanligini ta’kidlaydi.
Boshqalar esa notanish odamlarni uyga olib kirish xavfsizligi masalalariga jiddiy e’tibor berish zarurligini bildiradi. Bugungi kunda Yaponiyada yolg‘izlik muammosiga e’tibor qaratilgan ushbu loyiha ko‘plab fuqarolarga ma’naviy tayanadigan manba bo‘lishi kutilmoqda.
Ma’lumot uchun aytish joizki, Yaponiyada turli ijara xizmatlari rivojlangan. Faqatgina “buvijon” emas, balki oila a’zolari yoki vaqtinchalik “ijaradagi amaki” kabi xizmatlar ham mavjud.
“OK Obaa chan” loyihasini ayollar bandligini oshirishga yo‘naltirilgan Client Partners kompaniyasi boshqaradi. Bu kompaniya mijozlarga do‘st yoki vaqtinchalik oila a’zosi xizmatlarini ham taklif qiladi.
