Tailand va Kambodjada janglar davom etmoqda
Tailand va Kambodja o‘rtasidagi bahsli chegarada artilleriya hujumlari yakshanba kuni erta tongda davom etdi. Bu haqida Zamin.uz xabar berdi.
Bu voqea AQSh prezidenti Donald Trampning ikki davlat rahbarlari bilan telefon orqali muloqot qilganidan so‘ng yuz berdi. Muloqotdan keyin tomonlar o‘zaro otishmani to‘xtatishga rozi bo‘lgani haqida bayonot berilgan edi, ammo janglar to‘xtamadi.
Har ikki tomon bir-birini jangni boshlashda ayblamoqda. Kambodja Trampning sulh taklifini qo‘llab-quvvatlagan bo‘lsa-da, Tailand Bosh vaziri vazifasini bajaruvchi Fumtam hujumlar to‘xtatilmaguncha muzokaralar o‘tkazilmasligini ma’lum qildi.
Unga ko‘ra, Bangkok ikki davlat tashqi ishlar vazirlari darajasida muzokara o‘tkazib, sulh shartlarini belgilash tarafdori. Shuningdek, Tailand uchinchi davlat vositachiligisiz kelishuvga erishishni istamoqda.
To‘rt kun davom etgan janglarda halok bo‘lganlar soni 30 dan oshdi. Ular orasida Tailandda 13 va Kambodjada 8 tinch aholi vakili bor.
Ikkala davlatda 200 mingdan ortiq odam xavfsiz hududlarga evakuatsiya qilindi. Donald Tramp shanba kuni Tailand va Kambodja bosh vazirlari bilan muloqot qilib, ularni zudlik bilan uchrashuv o‘tkazib, sulhga erishishga chaqirdi.
U ijtimoiy tarmoqda har ikki tomon tinchlik izlayotgani haqida yozdi. AQSh hukumati mojaro tinch yo‘l bilan hal etilmaguncha ikki davlat bilan bojxona muzokaralarini to‘xtatganini bildirdi.
