Isroil G‘azoda harbiy operatsiyalarni vaqtincha to‘xtatdi
Isroil armiyasi G‘azo sektorining ayrim hududlarida harbiy operatsiyalarni har kuni ma’lum soatlar oralig‘ida vaqtincha to‘xtatishini e’lon qildi. Bu haqida Zamin.uz xabar berdi.
Ushbu qaror xalqaro bosim va G‘azoda kuchaygan ocharchilik inqirozi fonida qabul qilindi. Rasmiy bayonotga ko‘ra, harbiy harakatlar har kuni soat 10:00 dan 20:00 gacha Al-Mavosi, Deyr al-Balah va G‘azo shahar hududlarida to‘xtatiladi.
Shuningdek, armiyaning ta’kidlashicha, gumanitar yordam tashuvchi konvoylar uchun xavfsiz yo‘nalishlar har kuni soat 6:00 dan 23:00 gacha doimiy ravishda ochiq bo‘ladi. Bu yo‘nalishlar orqali oziq-ovqat, dori-darmon va boshqa zarur yordam vositalari yetkazilishi rejalashtirilmoqda.
Misrga aloqador "Al-Qahira News" telekanalining xabariga ko‘ra, Misrdan G‘azoga yordam ortilgan karvonlar harakatlana boshlagan. Shuningdek, Isroil bir necha soat oldin havo orqali ham yordam tashlashni boshlagan.
Birlashgan Millatlar Tashkiloti payshanba kuni bergan bayonotida insonparvarlik pauzalari yordam ko‘lamini oshirish imkonini berishini ta’kidlagan, ammo Isroil konvoylar uchun yetarli alternativ yo‘nalishlar taqdim etmagani sababli yordam ko‘rsatishga to‘sqinlik qilayotganini bildirgan. G‘azodagi insonparvarlik inqirozi bo‘yicha xalqaro xavotirlar ortib bormoqda.
Shu bilan birga, juma kuni Isroil va AQSh tomonidan Hamas bilan o‘t ochishni to‘xtatish bo‘yicha muzokaralar to‘xtatilgani e’lon qilindi. Ularning fikricha, Hamas sulhga erishishni istamayapti.
So‘nggi haftalarda G‘azo sektorida millionlab odamlar ochlik yoqasiga kelgan. Insonparvarlik tashkilotlari ma’lumotlariga ko‘ra, aholisi 2,2 millionga yaqin bo‘lgan G‘azoda oziq-ovqat zaxiralari tugagan.
Isroil mart oyidan boshlab hududga barcha ta’minotni to‘xtatgan, may oyidan esa yordamni cheklovlar bilan tiklagan. G‘azo sog‘liqni saqlash vazirligi ma’lumotlariga ko‘ra, urush boshlanganidan beri kamida 127 kishi, ulardan 85 nafari bolalar, ochlikdan vafot etgan.
Isroil hukumati G‘azoda ocharchilik yo‘qligini ta’kidlab, yordam ta’minotini to‘xtatish qarorini Hamas tomonidan ushlab turilgan garovdagilarni ozod qilishga majbur qilish chorasi sifatida izohlamoqda. Ular may oyida yordam kirishiga ruxsat berganini, ammo BMT uni yetarlicha tarqata olmayotganini bildirgan.
BMT esa faoliyatini Isroil cheklovlari ostida imkon qadar samarali davom ettirayotganini ma’lum qilgan. Urush 2023 yil 7 oktyabrda boshlangan.
O‘shanda Hamas jangchilari Isroil janubiga hujum qilib, 1200 dan ortiq tinch fuqaroni o‘ldirgan va 251 kishini garovga olgan edi. Shundan so‘ng Isroil tomonidan boshlangan harbiy amaliyotlar natijasida deyarli butun G‘azo infratuzilmasi vayron bo‘lgan.
G‘azo sog‘liqni saqlash rasmiylariga ko‘ra, urushdan hozirgacha taxminan 60 ming kishi halok bo‘lgan, ularning aksariyati tinch aholi vakillari hisoblanadi.
