Yaqinda BMT Xavfsizlik Kengashining yig‘ilishida Yevropa, Markaziy Osiyo va Amerika masalalari bo‘yicha BMT bosh kotibining o‘rinbosari Miroslav Yensa Ukrainada urush oqibatida yo‘q qilingan infratuzilmalarni tiklash uchun kamida 524 milliard dollar talab qilinishini ma’lum qildi. Bu haqida Zamin.uz xabar berdi.
Bu mablag‘ keyingi o‘n yil davomida barcha zararlarni qoplash uchun zarur bo‘ladi. Yensa o‘z chiqishida Rossiyaning Ukrainadagi fuqaroviy infratuzilmalarga qarata qilayotgan hujumlarini qattiq tanqid qildi va bunday harakatlar natijasida yetkazilayotgan zararlar kun sayin ortib borayotganini ta’kidladi.
Ma’lumotlarga ko‘ra, 2022 yil 24 fevraldan boshlab Rossiyaning harbiy harakatlari oqibatida 13 580 tinch aholi vakili, jumladan 716 bola halok bo‘lgan. Shuningdek, Yensa Ukrainadagi gumanitar vaziyatning og‘irlashayotganini aytdi.
Joriy yilning birinchi yarmida jabrlangan tinch aholi soni o‘tgan yilga nisbatan 50 foizga oshgan. Ayrim hududlarda uzoq masofaga uchuvchi raketalar va dronlar orqali amalga oshirilayotgan hujumlar ko‘payganligi sababli, aholining oziq-ovqat, toza suv, elektr energiyasi va tibbiy xizmatlardan foydalanishi cheklangan.
Ma’lumotlarga ko‘ra, Ukrainada 3,7 million kishi o‘z uyini tashlab, mamlakatning boshqa hududlariga ko‘chishga majbur bo‘lgan. Yana 6 million ukrainalik esa chet ellarda qochqin sifatida yashamoqda.
BMT bosh kotibining o‘rinbosari Xavfsizlik Kengashi a’zolaridan Ukrainada tinch aholi va fuqaroviy infratuzilmani himoya qilish, insonparvarlik yordamini kengaytirish hamda gumanitar operatsiyalarni kuchaytirishga alohida e’tibor qaratishni so‘radi. So‘nggi haftalarda Rossiya va Ukraina Istanbulda diplomatik muzokaralar olib borayotgani ta’kidlandi.
Yensa bu muloqotlar urushni to‘xtatish bo‘yicha kelishuvga erishishda muhim ahamiyatga ega ekanligini bildirdi. Shuningdek, Rossiyaning Ukrainaga yetkazgan zarariga doir turli raqamlar mavjud.
Masalan, Germaniya kansleri Fridrix Mers ikki hafta avval Moskvaning Ukrainaga yetkazgan zarar uchun taxminan 500 milliard yevro tovon to‘lashi kerakligini aytgan. Buyuk Britaniyaning “The Times” gazetasi tahlilchilari esa urushdan keyin Ukraina infratuzilmasini tiklash uchun kamida 400 milliard funt sterling, ya’ni 532 milliard dollar sarflanishi mumkinligini ta’kidlagan.
