Avstraliya 16 yoshgacha ijtimoiy tarmoqlarni taqiqlaydi
Avstraliya hukumati 16 yoshgacha bo‘lgan bolalar uchun ijtimoiy tarmoqlardan foydalanishni taqiqlovchi dunyodagi birinchi qonunni joriy qilmoqda. Bu haqida Zamin.uz xabar berdi.
Ushbu qonun doirasida TikTok, Instagram, Facebook, Snapchat, X (sobiq Twitter) va YouTube platformalarida 16 yoshdan kichiklar akkaunt ochishi taqiqlanadi. Qonun 2025-yilning dekabr oyidan kuchga kiradi.
Foydalanuvchilar video ko‘rish imkoniyatiga ega bo‘ladi, ammo ro‘yxatdan o‘tish, izoh qoldirish yoki video joylash taqiqlanadi. Google kompaniyasiga tegishli YouTube platformasi bu qarorga qarshi chiqdi va o‘zini ijtimoiy tarmoq emas, balki bolalarga foydali kontent taklif qiluvchi xizmat deb ta’kidladi.
Shu bilan birga, Avstraliya xavfsizlik komissari YouTube platformasini zararli kontent ko‘p uchraydigan joy sifatida baholab, taqiqni qo‘llab-quvvatladi. Avstraliya bosh vaziri Entoni Albanese bu chorani ijtimoiy tarmoqlarning bolalarga salbiy ta’sirini kamaytirishga qaratilgan muhim qadam deb atadi.
Aloqa vaziri Anika Uells esa bu qarorni bolalar sog‘lig‘i uchun olib borilayotgan kurash sifatida ko‘rsatdi. Yangi qonunga rioya qilmagan texnologik kompaniyalar 50 million Avstraliya dollarigacha jarimaga tortilishi mumkin.
Shuningdek, ular mavjud akkauntlarni o‘chirish, yangi ro‘yxatdan o‘tishni to‘xtatish va cheklovlarni buzadigan harakatlarga barham berishi talab etiladi. Bu qonun bolalar xavfsizligini ta’minlash va ularni zararli ta’sirlardan himoya qilishga qaratilgan muhim chora hisoblanadi.
