G‘azoda harbiy amaliyotlarda 60 mingdan ko‘p halok bo‘ldi

G‘azo Sog‘liqni Saqlash Vazirligi ma’lumotlariga ko‘ra, 2023-yil 7-oktabrdan buyon davom etayotgan Isroil harbiy amaliyotlari natijasida halok bo‘lganlar soni 60 mingdan oshdi. Bu haqida Zamin.uz xabar berdi.

Vazirlikning so‘nggi bayonotida halok bo‘lganlar soni kamida 60 034 kishini tashkil etayotgani aytilmoqda. Ularning 18 592 nafari bolalar, 9 782 nafari ayollar hisoblanadi.

So‘nggi 24 soat ichida kamida 112 kishi halok bo‘lib, jumladan 22 nafari gumanitar yordam olishga harakat qilayotgan fuqarolar bo‘lgan. Havo hujumlari G‘azo shahri, Xon Yunis, Nuseyrat va Al-Mavasi hududlarida ko‘plab tinch aholi vakillarining halok bo‘lishiga sabab bo‘ldi.

Ayrim oilalar deyarli butunlay yo‘q qilindi. Shuningdek, gumanitar yordam tarqatiladigan joylarda ham hujumlar sodir bo‘ldi.

Birlashgan Millatlar Tashkiloti ma’lumotlariga ko‘ra, 27-maydan beri 1000 dan ortiq falastinlik yordam olishga uringan paytda halok bo‘ldi. Isroil esa bunday da’volarni rad etib, faqat ogohlantirish o‘qlari otilganini ta’kidlamoqda.

Shu bilan birga, G‘azoda ochlik muammosi kuchaymoqda. BMT homiyligidagi global oziq-ovqat xavfsizligi bo‘yicha ekspertlar eng yomon ssenariy – ocharchilik – hozirda ro‘y bermoqda, deb ogohlantirmoqda.

Isroil rasmiylari halok bo‘lganlar soni haqidagi ma’lumotlarni tanqid qilmoqda. Ularning aytishicha, halok bo‘lganlarning qancha qismi jangarilar ekanini aniqlash qiyin.

Isroil armiyasi yil boshidan buyon 20 mingdan ortiq Hamas va Islomiy Jihod jangchilarini yo‘q qilganini ma’lum qilgan.