Rossiyaning Kamchatka yarimorolida 8,7 magnitudali kuchli zilzila yuz berdi. Bu haqida Zamin.uz xabar berdi.
Bu hodisa 1952-yildan beri ushbu hududda qayd etilgan eng kuchli yer silkinishi hisoblanadi. Zilzilaning markazi aynan Kamchatka yarimorolida joylashgan bo‘lib, kuchli silkinishlar nafaqat Rossiyada, balki Tinch okeani sohilidagi boshqa davlatlarda ham xavf tug‘dirmoqda.
Siesmologlar bir necha bor takroriy silkinishlar, ya’ni aftershoklar yuz berishi mumkinligini ogohlantirmoqda. Zilzila natijasida Rossiya hukumati Kuril orollarida sunami xavfi haqida rasmiy ogohlantirish berdi.
Yaponiya tomoni esa uch metr balandlikdagi sunami to‘lqinlari yaqinlashayotgani haqida xabar berdi. Shu sababli qirg‘oqbo‘yidagi aholi favqulodda evakuatsiya qilinmoqda.
Shuningdek, AQShning G‘arbiy sohillari, xususan Alyaska, Kaliforniya va Gavayi orollarida ham sunami xavfiga oid ogohlantirishlar berildi. AQSh Milliy okean va atmosfera boshqarmasi (NOAA) ehtimoliy xavfga tayyorgarlik darajasini oshirdi.
Hozircha zilzila oqibatida jabrlanganlar yoki katta vayronagarchiliklar haqida rasmiy ma’lumot yo‘q. Biroq qidiruv va qutqaruv guruhlari tayyor holatga keltirilgan hamda xavfli hududlarda nazorat kuchaytirilgan.
Xalqaro siesmologlar fikricha, bu zilzila “Tinch okeani olov halqasi”dagi seysmik faollikning kuchayganidan dalolat beradi. Mutasaddilar barcha aholiga hushyor bo‘lish va favqulodda vaziyatlarga tayyor turishni qat’iy tavsiya qilmoqda.
