AQShda dunyoda ilk bor Baxt fakulteti ochildi
Amerika Qo‘shma Shtatlarining yetakchi oliy o‘quv yurtlaridan birida dunyoda ilk bor “Baxt” fakulteti tashkil etildi. Bu haqida Zamin.uz xabar berdi.
Ushbu fakultetning maqsadi zamonaviy jamiyatda ko‘payib borayotgan ruhiy salomatlik muammolariga, xususan, xavotir, depressiya, yolg‘izlik va hayotdan norozilikka qarshi ilmiy yondashuvni taqdim etishdir. Fakultet vakillarining ta’kidlashicha, hozirgi kunda ruhiy iztiroblar jahon miqyosida ortib bormoqda va baxtni ilmiy asosda o‘rganish juda muhim vazifa hisoblanadi.
Ta’lim jarayoni to‘liq onlayn shaklda olib boriladi va 4 yil davom etadi. Talabalarga neyrobiologiya, psixologiya, dinshunoslik, falsafa, adabiyot va boshqa gumanitar fanlar bo‘yicha darslar beriladi.
Ushbu yo‘nalishni muvaffaqiyatli tamomlagan bitiruvchilar sog‘liqni saqlash, siyosiy maslahat berish, ta’lim sohasida o‘qituvchilik, ilmiy tadqiqotlar yoki ruhiy barqarorlikni targ‘ib qilish kabi sohalarda faoliyat yuritish imkoniyatiga ega bo‘ladilar. Dastlab fakultetga 25 nafar talaba qabul qilinishi rejalashtirilgan bo‘lib, keyinchalik talabalar soni 100 nafargacha oshirilishi ko‘zda tutilgan.
Shu tariqa, baxt endi shaxsiy his-tuyg‘udan tashqari, o‘rganiladigan va o‘rgatiladigan fan sifatida tan olinmoqda. Bu yangilik ruhiy salomatlikni yaxshilashga va jamiyatdagi ijtimoiy muammolarni bartaraf etishga xizmat qiladi.
