Avstraliyada bolalar bog‘chasida zo‘ravonlik aybi bilan hibsda
Avstraliyada bolalar bog‘chasida ishlagan 26 yoshli David James ismli shaxsga bolalarga nisbatan zo‘ravonlik qilganlik va buni videoga olganlik ayblovi qo‘yildi. Bu haqida Zamin.uz xabar berdi.
Politsiya tergoviga ko‘ra, u 2021-yildan 2024-yilgacha Sidney shahrida joylashgan oltita bolalarni maktabdan keyin parvarishlash markazida faoliyat yuritgan. Shu davr mobaynida 5-6 yoshdagi o‘n nafar bola bilan bog‘liq zo‘ravonlik holatlari sodir etilgan bo‘lishi mumkin.
Avstraliya Federal Politsiyasi ma'lumotlariga ko‘ra, gumonlanuvchi jami qariyb 60 ta bolalar muassasasida ishlagan. U 2023-yil oktyabr oyidan buyon hibsda turibdi, biroq tergov davomida jabrlanuvchilar aniqlanmaguncha uning ismi oshkor qilinmagan.
Mazkur jinoyat Avstraliyada bolalarni parvarishlash tizimidagi xavfsizlik choralariga oid jiddiy savollarni keltirib chiqardi. So‘nggi yillarda mamlakatda bir necha yuqori darajadagi jinsiy va jismoniy zo‘ravonlik holatlari aniqlangan bo‘lib, bu bolalar xavfsizligini ta’minlash siyosatini qayta ko‘rib chiqishga sabab bo‘lmoqda.
Politsiya ma’lumotiga ko‘ra, gumonlanuvchiga oid zo‘ravonlik aks etgan materiallar internetning “dark web” deb ataladigan yashirin qismida topilgan. Shu asosda tergovchilar David James shaxsini aniqlashga muvaffaq bo‘lgan.
Hozirda ayblovlar faqat oltita markazdagi holatlarga taalluqli bo‘lib, boshqa joylarda jinoyat sodir etilganiga oid dalillar topilmagan. Politsiya jabrlanuvchilarning oilalariga shaxsan murojaat qilib, boshqa ota-onalarga “agar siz bilan bog‘lanilmagan bo‘lsa, demak tergovda sizning oilangiz bilan bog‘liq hech qanday dalil topilmagan” deb xotirjamlik bildirgan.
