Rossiya prezidenti Vladimir Putin ekstremistik deb e’lon qilingan materiallarni internet orqali qasddan qidirganlik uchun ma’muriy jarima joriy etishni nazarda tutuvchi Ma’muriy javobgarlik to‘g‘risidagi kodeksga o‘zgartirish kiritdi. Bu haqida Zamin.uz xabar berdi.
Bu haqda Kreml manbalari ma’lumot berdi. Endilikda Adliya vazirligi tomonidan yuritiladigan ekstremistik materiallar ro‘yxatidagi nashrlarni, jumladan VPN xizmatlari yordamida qidirgan shaxslarga 3 mingdan 5 ming rublgacha jarima solinadi.
Ya’ni, foydalanuvchi maxsus vositalar orqali bunday materiallarga qasddan murojaat qilgan taqdirda, jarimadan qochib qutulolmaydi. Shuningdek, VPN xizmatlarini targ‘ib qilganlik uchun ham jarima belgilandi.
Jismoniy shaxslarga 50 mingdan 80 ming rublgacha, mansabdor shaxslarga 80 mingdan 150 ming rublgacha, yuridik shaxslarga esa 200 mingdan 500 ming rublgacha jarima qo‘yiladi. Hozircha VPN xizmatidan oddiy foydalanish huquqbuzarlik hisoblanmaydi, ammo agar u qonunbuzarlikni yashirish yoki javobgarlikdan qochish uchun ishlatilsa, bu holat og‘irlashtiruvchi omil sifatida ko‘riladi.
17 iyul kuni Davlat Dumasida ushbu qonun loyihasi ko‘rib chiqildi va qabul qilindi. Ovoz berishda 306 deputat qo‘llab-quvvatladi, 67 nafar qarshi chiqdi, 22 nafari esa betaraf qoldi.
Yangi qonun Rossiyada internetda faoliyat yuritish uchun javobgarlikni yanada kuchaytiradi va davlat tomonidan ta’qiqlangan yoki nazorat qilinadigan kontentga nisbatan qat’iy choralar ko‘rilishini anglatadi. Ushbu o‘zgarishlar 2025 yil 1 sentyabrdan kuchga kiradi.
