Ukraina Milliy aksilkorrupsiya byurosi (NABU) tomonidan olib borilayotgan surishtiruv doirasida mamlakat prezidenti Volodimir Zelenskiy devoni rahbarining sobiq o‘rinbosari Rostislav Shurmaga tegishli uyda tintuv o‘tkazildi. Bu haqida Zamin.uz xabar berdi.
Bu haqda Germaniyaning nufuzli “Der Spiegel” nashri xabar berdi. Ma’lum qilinishicha, 15 iyul kuni Bavariya federal yerlaridan biri bo‘lgan Shtarnberg shahrida joylashgan Shurma yashaydigan manzilda nemis huquqni muhofaza qiluvchi organlari NABUning so‘rovi asosida tintuv ishlarini amalga oshirgan.
Nashr ta’kidicha, ushbu harakat Ukrainadagi siyosiy vaziyat uchun juda nozik davrda ro‘y berdi. Chunki bir hafta o‘tib, Zelenskiy korrupsiyaga qarshi kurashish milliy byurosi va korrupsiyaga qarshi ixtisoslashtirilgan prokuraturaning vakolatlarini cheklash to‘g‘risida qaror qabul qilgan.
Rossiya bilan davom etayotgan urush fonida 41 yoshli Shurmaning qanday qilib Bavariyaga ko‘chib o‘tganiga oid aniq ma’lumotlar hozircha mavjud emas. Oldinroq “Ukrainskaya pravda” nashri manbalariga tayanib, prezident devoni rahbari Andrey Yermakning iqtisodiy masalalar bo‘yicha o‘rinbosari bo‘lgan Shurma “manfaatlar to‘qnashuvi va AQSH rasmiylarining bosimi” sababli lavozimidan ozod etilganini ma’lum qilgan.
Shuningdek, Shurmaning akasiga tegishli kompaniyalar “yashil tarif” mexanizmi orqali davlat mablag‘larini qoplagani haqidagi ma’lumotlar ommaga tarqalganidan so‘ng, xalqaro hamkorlar u bilan hamkorlikni to‘xtatishga qaror qilgan. Ukraina “NV” nashri esa Shurmaning ishdan bo‘shatilishi 2024 yil bahorida prezident Zelenskiy va AQSH davlat kotibi Entoni Blinken o‘rtasida bo‘lib o‘tgan muloqotlardan so‘ng rasmiylashtirilganini yozadi.
Rasmiy ma’lumotlarga ko‘ra, u 2024 yil 3 sentyabr kuni lavozimidan ozod qilingan.
