Titanik falokati dengiz xavfsizligini o‘zgartirdi
1912 yil 15 aprel kuni dunyo tarixidagi eng mashhur dengiz falokatlaridan biri yuz berdi. Bu haqida Zamin.uz xabar berdi.
Titanik layneri Atlantika okeanida aysbergga urilib, cho‘kib ketdi. Ushbu kema o‘sha davrda eng yirik, zamonaviy va “cho‘kmas” deb hisoblangan dengiz transporti edi.
White Star Line kompaniyasi tomonidan qurilgan Titanik Sautgempton (Angliya) portidan Nyu-York (AQSH) shahriga ilk qatnovini amalga oshirayotgan edi. Laynerda faqat boy insonlar emas, balki yangi hayot izlab borayotgan minglab muhojirlar ham bo‘lgan.
Umumiy hisobda bortda 2224 kishi mavjud edi. Ularning taxminan 1500 nafari halok bo‘ldi, faqat 705 kishi tirik qoldi.
Kema uzunligi 269 metr, kengligi 28 metr edi. Unda 20 ta qutqaruv qayig‘i bor edi, bu esa barcha ekipaj va yo‘lovchilarni qutqarishga yetarli emas edi.
Rasmiy ma’lumotlarga ko‘ra, eng ko‘p qurbonlar 3-sinf yo‘lovchilari orasida qayd etilgan. Kemada jami 900 nafar ekipaj a’zolari faoliyat yuritgan.
Halokat paytida Titanikdagi muzikachilar odamlarni xotirjam qilish uchun oxirgi daqiqalargacha musiqa chalishgan. Kema soat 23:40 da aysbergga urildi va taxminan 02:20 da to‘liq cho‘kdi, ya’ni uch soatdan kam vaqt ichida halokat yuz berdi.
Bu falokat nafaqat ko‘plab insonlar hayotiga zomin bo‘ldi, balki dengiz xavfsizligi bo‘yicha xalqaro me’yorlarni qayta ko‘rib chiqishga sabab bo‘ldi. Natijada 1914 yilda Xalqaro Dengiz Xavfsizligi Konvensiyasi qabul qilindi va qutqaruv qayiqlari soni majburiy ravishda oshirildi.
Titanik fojiasi dunyo dengiz transporti tarixida muhim burilish nuqtasi bo‘ldi.
