Rossiyaning Qora dengiz sohilidagi Sochi shahri yaqinida joylashgan yirik neft omborxonasi yonib ketdi. Bu haqida Zamin.uz xabar berdi.
Mahalliy rasmiylar bu yong‘in Ukrainadan uchirilgan dron sabab yuzaga kelganini bildirdi. Yong‘in natijasida Sochi xalqaro aeroporti vaqtincha ish faoliyatini to‘xtatdi.
Krasnodar o‘lkasi gubernatori Veniamin Kondratyev dron parchasi yoqilg‘i saqlanayotgan idishga tushib, yong‘inga sabab bo‘lganini va 127 nafar yong‘in o‘chirish xodimi hodisa joyida faoliyat olib borayotganini ma’lum qildi. Shu bilan birga, Ukraina janubidagi Mikolayiv shahri Rossiya tomonidan raketa hujumiga uchradi.
Mahalliy rasmiylar hujum oqibatida uylar va fuqarolik infratuzilmasi zarar ko‘rganini, kamida yetti nafar tinch aholi jarohat olganini aytdi. Ukraina Favqulodda vaziyatlar xizmati uch kishi shifoxonaga yotqizilganini tasdiqladi.
Sochidagi neft bazasiga uyushtirilgan hujum Ukraina tomonidan ushbu hafta davomida amalga oshirilgan bir qator dron hujumlaridan biri hisoblanadi. Shu kunlarda Ryazan, Penza va Voronej kabi janubiy Rossiya shaharlariga ham hujumlar bo‘ldi.
Voronej gubernatori dron hujumi natijasida to‘rt kishi jarohat olganini ma’lum qildi. Rossiya Mudofaa vazirligi ma’lumotiga ko‘ra, o‘tgan kechasi Ukrainadan uchirilgan 93 ta dron aniqlangan, shulardan 60 tasi Qora dengiz hududida yo‘q qilingan.
Ukraina Harbiy-havo kuchlari esa Rossiya tomonidan 83 yoki 76 ta dron hamda yetti raketa uchirilganini, ulardan 61 tasi urib tushirilganini bildirgan. Shunga qaramay, 16 dron va 6 raketa Ukraina hududining sakkizta nuqtasiga zarba bergan.
O‘tgan hafta Ukraina poytaxti Kyivda yuz bergan raketa hujumi oqibatida kamida 31 kishi halok bo‘lgan. Bu voqea 2022-yil fevralida boshlandi urush davrida shahar uchun eng halokatli hujumlardan biri sifatida baholanmoqda.
Vaziyat keskinlashgani sababli Ukraina Prezidenti Volodimir Zelenskiy xalqaro hamjamiyatni Rossiyaga nisbatan qat’iyroq sanksiyalar joriy etishga chaqirdi. AQSh Prezidenti Donald Tramp esa Rossiyaning harakatlarini qoralab, yangi sanksiyalar haqida bayonot berdi.
Iyul oyida Tramp Rossiyaga 50 kun ichida urushni to‘xtatish bo‘yicha ultimatum bergan edi. Aks holda Rossiyaning neft eksportiga qattiq bojlar joriy etilishi ta’kidlangan.
Bugungi kunda u bu muddatni 10-12 kungacha qisqartirib, yangi muddatni 8-avgustga belgiladi. Ushbu voqealar Rossiya va Ukraina o‘rtasidagi urushning yuqori harbiy faollik bilan davom etayotganini va tinch aholi uchun katta xavf mavjudligini yana bir bor ko‘rsatmoqda.
