BMT faoliyatida majlis va hisobotlar ko‘pligi muammo
Birlashgan Millatlar Tashkiloti (BMT) o‘z faoliyat samaradorligini oshirish va xarajatlarni kamaytirish maqsadida tayyorlangan yangi hisobotda muhim muammolarni ma’lum qildi. Bu haqida Zamin.uz xabar berdi.
Tashkilot tomonidan ishlab chiqilayotgan ko‘plab hisobotlarni deyarli hech kim o‘qimayotgani aniqlangan. BMT bosh kotibi Antoniu Guterrishning so‘zlariga ko‘ra, 2024 yilda tashkilot 27 mingdan ortiq majlis o‘tkazgan va 240 ga yaqin turli organ ishtirok etgan.
Shuningdek, BMT kotibiyati tomonidan 1100 dan ortiq rasmiy hisobot tayyorlangan, bu esa 1990 yilga nisbatan 20 foiz ko‘proqdir. Guterrish ta’kidlaganidek, majlislar va hisobotlarning ko‘pligi tizim va xodimlarni charchatmoqda.
Hisobotlarning ko‘pchiligiga yetarlicha e’tibor qaratilmayapti. Eng mashhur 5 foiz hisobot 5500 martadan ko‘proq yuklab olingan, ammo har beshinchi hisobot ming martadan kam yuklab olingan.
Shuningdek, yuklab olish hisobot o‘qilganini anglatmasligini ta’kidladi. Muammoni hal etish uchun Guterrish 2025 yil mart oyida “BMT80” deb nomlangan maxsus ishchi guruhni tashkil etdi.
Ushbu guruh tashkilot faoliyatini zamonaviy talablar asosida isloh qilishga qaratilgan. Bosh kotib yana moliyaviy qiyinchiliklarga ham e’tibor qaratdi.
So‘nggi yetti yil davomida BMT doimiy likvidlik inqiroziga duch kelmoqda. Bu esa 193 a’zo davlatning o‘z majburiy to‘lovlarini o‘z vaqtida va to‘liq amalga oshirmasligi bilan bog‘liq.
Guterrish o‘z xulosasida kamroq majlislar va kamroq hisobotlar bo‘lishi kerakligini ta’kidladi. Bu esa tashkilot ish samaradorligini oshirish va resurslarni oqilona boshqarish uchun zarurdir.
