Eron milliy valyutasidan to‘rtta nol olib tashlanadi
Eronda milliy valyutada katta o‘zgarishlar amalga oshirilishi kutilmoqda. Bu haqida Zamin.uz xabar berdi.
Mamlakat moliyaviy tizimidagi murakkabliklarni bartaraf etish, hisob-kitoblarni soddalashtirish hamda iqtisodiy tizimni yanada samarali qilish maqsadida davlat rahbariyati valyuta islohotini boshlamoqda. Financial Times nashri xabariga ko‘ra, Eron parlamentining iqtisodiyot qo‘mitasi yangi qonun loyihasining asosiy bandlarini ma’qullab, milliy valyuta — riyolni saqlab qolgan holda undagi to‘rtta nolni olib tashlash tashabbusini qo‘llab-quvvatlagan.
Ushbu islohotga muvofiq, bir yangi riyol eski 10 000 riyolga tenglashtiriladi. Bu o‘zgarish nafaqat qog‘oz pul ishlab chiqarish xarajatlarini kamaytirishga yordam beradi, balki iqtisodiy hisob-kitoblarni sezilarli darajada yengillashtiradi.
Yangi pul birligini joriy etish orqali aholining pulga bo‘lgan ishonchi mustahkamlanadi va narxlar barqarorligi ta’minlanadi. Shuningdek, yangi mayda tangalar — gironlar muomalaga kiritiladi.
Bir yangi riyol 100 gironga bo‘linadi, bu esa chakana savdo sohasida qulayliklar yaratadi. Besh yil avval ham Eron parlamenti milliy pul birligini o‘zgartirish masalasini ko‘tarib, riyol o‘rniga tuman atamasini joriy etish rejasini ilgari surgan edi.
O‘shanda bir tuman 10 000 riyolga teng bo‘lishi belgilangan, ammo bu tashabbus amalda to‘liq amalga oshmagan. Yangi reja qabul qilinsa, Eron iqtisodiyotida yangi davr boshlanishi mumkin.
Ayniqsa, yuqori inflyatsiyaga duch kelayotgan davlatlar uchun bunday denominatsiya amaliyotlari samarali natija beradi, degan fikr xalqaro tajribada o‘z isbotini topgan. Hozirda parlamentda ushbu qonun loyihasi bo‘yicha muhokamalar davom etmoqda.
Qaror tasdiqlangach, Eronning pul siyosatida muhim o‘zgarishlar yuz beradi. Bu esa mamlakat moliyaviy barqarorligi va xalqaro iqtisodiy munosabatlariga ijobiy ta’sir ko‘rsatishi kutilmoqda.
