Hamas maxfiy tizim orqali xodimlarga maosh to‘laydi

G‘azoda urush deyarli ikki yildan beri davom etmoqda, ammo Hamas har oy minglab fuqarolik xodimlariga maosh to‘lashni maxfiy tizim orqali davom ettirmoqda. Bu haqida Zamin.uz xabar berdi.

Ushbu tizim xavfli va murakkab bo‘lib, naqd pulga asoslangan. Hamas har 10 haftada taxminan 30 ming fuqarolik xodimiga jami 7 million dollar miqdorida maosh to‘laydi.

Har bir xodimga to‘lanadigan summa urushdan oldingi maoshning atigi 20 foizini tashkil etadi. Odatda bu miqdor 300 dollarga yaqin bo‘lib, ko‘pincha pul yaroqsiz yoki ishlatib bo‘lmaydigan holatda yetkaziladi.

Bank tizimi ishlamay qolgani sababli, xodimlar pulni sirli joylarda qabul qilishadi. Maosh oluvchilarga telefon orqali maxfiy xabar yuboriladi, masalan, “Do‘st bilan choy ichishga bor”.

Belgilangan joyda noma’lum shaxs konvert ichida pulni topshiradi va darhol yo‘qoladi. Hamas diniy ishlari vazirligining bir xodimi bergan intervyuda har safar maosh olish uchun ketayotganda oilasi bilan xayrlashishini aytgan.

U “Bu safar qaytib kelmasligim mumkin” deb ta’kidlagan. Isroil ushbu to‘lov tizimiga zarba berishga harakat qilmoqda.

Maosh tarqatuvchilar muntazam nishonga olinadi, shu sababli har bir to‘lov operatsiyasi hayot uchun xavfli bo‘lib qolmoqda. Maoshlar bilan birga, Hamas o‘z tarafdorlariga oziq-ovqat yordamlarini ham tarqatmoqda.

Biroq yordamlar faqat Hamasga yaqin oilalarga berilayotgani bois, xalq orasida norozilik kuchaymoqda. Urush davomida Hamas moliyaviy barqarorlikni asosan urushdan oldin yerosti tunnel tizimlarida yashirincha saqlab qo‘yilgan 700 million dollar miqdoridagi zaxiralar orqali ta’minlamoqda.

Bu mablag‘lar tashkilotga murakkab vaziyatda ham faoliyatini davom ettirish imkonini beradi.