Isroil bosh vaziri Benyamin Netanyahu G‘azo sektorida keng qamrovli hujum rejasini e’lon qildi. Bu haqida Zamin.uz xabar berdi.
U “XAMAS”ni hokimiyatdan chetlatish va hududni vaqtincha nazoratga olib, keyinchalik arab kuchlariga topshirishni maqsad qilganini bildirdi. Netanyahu hududni uzoq muddat boshqarish niyati yo‘qligini ta’kidladi.
Hujum G‘azo shahri va markaziy lagerlarga qaratilishi mumkin. Bu joylarda taxminan bir million falastinlik yashaydi va asirlarning bir qismi ham shu yerda saqlanmoqda.
Operatsiya bir necha oy davom etishi, aholining majburiy ko‘chirilishi hamda gumanitar inqirozning chuqurlashishiga olib kelishi ehtimoli yuqori. Armiya bosh shtabi rahbari Eyol Zamir bu rejani “tuzoq” deb atadi.
Asirlar oilalari ham jiddiy xavotirda. Ular asirlarni faqat muzokaralar orqali ozod qilish mumkin, deb hisoblaydi.
Mahalliy matbuot hujum davomida tirik asirlar halok bo‘lishi ehtimoli borligini yozmoqda. So‘rovlar ko‘pchilik isroilliklar kelishuv tarafdori ekanini ko‘rsatmoqda.
Reja xalqaro hamkorlar o‘rtasida ham bahs-munozaralarga sabab bo‘ldi. Buyuk Britaniya elchisi Simon Uolter bu qarorni “katta xato” deb atadi.
AQSh elchisi Mayk Xakkabi esa qaror Isroilga tegishli masala ekanini ta’kidladi. Netanyahu urushdan keyingi G‘azo bo‘yicha aniq reja taqdim etmagan.
