Pol Biya 92 yoshda Kamerun prezidentligiga nomzod
Kamerun Konstitutsiyaviy kengashi 12-oktabr kuni bo‘lib o‘tadigan prezident saylovida 92 yoshli amaldagi prezident Pol Biyani nomzod sifatida ro‘yxatga oldi. Bu haqida Zamin.uz xabar berdi.
Agar Biya saylovda g‘alaba qozonsa, u yuz yoshga yaqinlashgunga qadar mamlakatni boshqarishda davom etishi mumkin. Saylovda jami 83 nomzod ishtirok etmoqchi bo‘lgan, biroq faqat 12 nafari hujjatlari to‘liq va talabga javob bergani uchun qatnashish huquqiga ega bo‘ldi.
Qolgan nomzodlar hujjat kamchiligi, garov puli to‘lanmagani yoki bir partiyadan bir nechta nomzod ko‘rsatilgani sababli saylovdan chetlatildi. Pol Biyaning asosiy raqiblari sifatida sobiq ittifoqchilari Bello Bouba Maigari va Issa Tchiroma Bakari, yosh siyosatchi Kabral Libii, xalqaro korrupsiyaga qarshi faoliyat yurituvchi advokat Akere Muna hamda Sotsial-demokratik front yetakchisi Joshua Osih tanilgan.
Tahlilchilar Kabral Libii yoki Akere Munani eng kuchli muxolif nomzodlar sifatida ko‘rsatmoqda. Biroq uzoq yillar hukumat tizimida faol bo‘lgan Maigari va Tchiroma muxolifat saylovchilarining ishonchini qozona olmasligi aytilmoqda.
Mutaxassislar muxolifat yagona nomzod atrofida birlashmasa, Pol Biyaning saylovda g‘alaba qozonishi oson bo‘lishini ta’kidlamoqda. 1992-yilda ham yagona kuchli muxolif nomzod bilan u qiyin sharoitda g‘alaba qozongan edi.
Hozirgi kunda ham muxolifat birlashmasa, Biya sakkizinchi muddatga saylanish imkoniyatiga ega bo‘lishi ehtimoli yuqori hisoblanadi.
