Yevropa aeroportlarida suyuqlik cheklovi bekor qilinadi
Yevropa aeroportlarida suyuqliklar hajmiga qo‘yilgan 100 millilitrlik cheklov tez orada bekor qilinishi mumkin. Bu haqida Zamin.uz xabar berdi.
Ushbu cheklov yuzlab million yo‘lovchilar uchun noqulaylik tug‘dirib kelayotgan edi. Bu haqda Yevrokomissiya manbalariga tayangan holda Euronews nashri xabar berdi.
Cheklov xavfsizlikni ta’minlash maqsadida joriy etilgan bo‘lib, avvalgi rentgen uskunalari suyuq portlovchi moddalarni aniqlay olmasligi sababli qo‘llanilgan edi. Biroq zamonaviy texnologiyalar rivojlanishi bilan vaziyat o‘zgarib bormoqda.
Yangi avlod skaner uskunalari portlovchi moddalarni aniqlash imkonini beradi va shu bois cheklovlar qayta ko‘rib chiqilmoqda. Yevropa fuqaro aviatsiyasi konferensiyasida iyun oyida ma’qullangan yangi tizim hozirda ishlab chiqaruvchilar tomonidan sinovdan o‘tkazilmoqda.
U rasmiy tasdiqlangach, keng miqyosda joriy etilishi kutilmoqda. Hozirda Italiyadagi Rim va Milan shaharlaridagi ayrim aeroportlarda bu texnologiyalar sinov tariqasida o‘rnatilgan.
Italiyada yetti terminal zamonaviy skanerlar bilan jihozlangan bo‘lib, yo‘lovchilar kattaroq hajmdagi suyuqliklarni qo‘l yukida olib o‘tish imkoniga ega bo‘lmoqda. Yevropaning boshqa mamlakatlari, jumladan Germaniya, Irlandiya, Litva, Malta, Shvetsiya va Niderlandiya aeroportlari ham yaqin kelajakda ushbu texnologiyani joriy etishni rejalashtirmoqda.
Bu o‘zgarishlar millionlab yo‘lovchilar uchun katta qulaylik yaratadi. Endilikda kosmetika, parfyumeriya va shifobaxsh vositalarni maxsus idishlarga solib, doimiy o‘lchash va cheklovlarga rioya qilish shart bo‘lmasligi mumkin.
Shunga qaramay, yangi tizimni keng joriy etish uchun vaqt kerak bo‘ladi, chunki bunday uskunalar an’anaviy qurilmalarga nisbatan qimmat va har bir aeroportda texnik hamda moliyaviy tayyorgarlik talab etiladi. Shu bilan birga, yangi tizim xalqaro havo qatnovi xavfsizligini yanada mustahkamlashga xizmat qiladi.
Yevropa Ittifoqi bu borada zamonaviy yondashuvni tanlab, inson omiliga ko‘proq e’tibor qaratmoqda. Jamoatchilik esa yaqin kelajakda bunday yangiliklarning hayotga qanday ta’sir qilishini qiziqish bilan kutmoqda.
