Moskva shahrida Rossiya Federatsiyasi va O‘zbekiston maxsus xizmatlari hamkorligida yirik terrorchilik guruhiga qarshi qo‘shma amaliyot o‘tkazildi. Bu haqida Zamin.uz xabar berdi.
FSB jamoatchilik bilan aloqalar markazi ma’lumotlariga ko‘ra, Rossiyada faoliyati taqiqlangan xalqaro terrorchilik tashkilotiga mehnat muhojirlarini yollash bilan shug‘ullangan to‘qqiz nafar xorijiy fuqaro qo‘lga olindi. Ushbu amaliyot Davlat xavfsizlik xizmati, Federal xavfsizlik xizmati va Rossiya Federatsiyasi Tergov qo‘mitasi o‘rtasidagi hamkorlik doirasida amalga oshirildi.
Tergov organlari ma’lumotlariga ko‘ra, qo‘lga olingan shaxslar xalqaro terrorchilik tashkiloti yacheykasida faoliyat yuritib, Yevropa Ittifoqi hududidagi mafkuraviy rahbarlar bilan aloqada bo‘lgan. Ular Rossiya hududida yashovchi muhojirlarni turli usullar bilan o‘z saflariga jalb qilishga harakat qilgan.
Amaliyot davomida huquq-tartibot organlari yollovchilik faoliyatiga oid aniq dalillarni to‘pladi. Ma’lumotlarga ko‘ra, ular 2025 yil apreligacha Moskvada faol tashviqot ishlarini olib borgan.
Yollovchilar yashirin uchrashuvlar tashkil qilgan, Telegram messenjeri orqali videokonferensiyalar o‘tkazib, muhojirlarga radikal g‘oyalarni singdirgan. Qo‘lga olinganlar orasida 38 va 39 yoshli ikki shaxsga Rossiya Federatsiyasi Jinoyat kodeksining 205.5-moddasi 1-qismi bo‘yicha jinoyat ishi qo‘zg‘atilib, ular qamoqqa olindi.
Tintuv jarayonida terrorchilik tashkiloti targ‘ibot materiallari, aloqa vositalari, elektron axborot tashuvchilar va boshqa hujjatlar musodara qilindi. Mutasaddilar ta’kidicha, bunday qo‘shma amaliyotlar kelgusida ham davom ettiriladi va Rossiya hududida xavfsizlikni ta’minlash uchun barcha zarur choralar ko‘riladi.
