Bangkokdagi ofis minorasi qulashida 23 kishi ayblanmoqda
Tailand prokuraturasi Bangkok shahrida joylashgan 30 qavatli ofis minorasining qulashi bilan bog‘liq holda 23 nafar shaxs va kompaniyaga rasmiy ayblov e’lon qildi. Bu haqida Zamin.uz xabar berdi.
Ulardan biri mashhur qurilish oligarxi Premchay Karnasuta boshchiligidagi Italian-Thai Development kompaniyasi, shuningdek, Xitoyning yirik davlat korporatsiyasi China Railway ham ayblanmoqda. Tergov jarayonida ular qurilish standartlarini buzish hamda rasmiy hujjatlarni soxtalashtirishda gumon qilinmoqda.
Dastlabki tergov natijalari minoraning qulashiga loyiha va qurilish bosqichlarida yuzaga kelgan jiddiy kamchiliklar sabab bo‘lganini ko‘rsatmoqda. Bundan tashqari, ishlatilgan qurilish materiallari sifati va texnologik jarayonlarning talabga javob bermagani aniqlangan.
Ushbu holat mamlakatda katta shov-shuvga sabab bo‘ldi. 2025 yil 28 mart kuni Myanmar hududida yuz bergan kuchli zilzila oqibatida Bangkokdagi Milliy audit idorasining qurilayotgan minorasi qulab tushgan.
Ushbu falokat natijasida 92 kishi halok bo‘lgan, 9 nafar odam jarohat olgan, shuningdek, 4 ishchi bedarak yo‘qolgan hisoblanadi. Qulagan bino qurilishining atigi 30 foizi yakunlangan edi va u zilziladan eng ko‘p zarar ko‘rgan yagona inshoot sifatida qayd etildi.
Ushbu voqea Tailand tarixidagi eng yirik va fojeali tuzilmaviy qulashlardan biri hisoblanadi. Hozirda tergov ishlari davom etmoqda va javobgar shaxslar aniqlanmoqda.
