Isroil bosh vaziri Binyamin Netanyahu Quddusda xorijiy ommaviy axborot vositalari vakillari uchun o‘tkazilgan matbuot anjumanida G‘azo sektoridagi urushni yakunlash bo‘yicha besh tamoyildan iborat reja taqdim etdi. Bu haqida Zamin.uz xabar berdi.
Dasturga ko‘ra, HAMASni quroldan voz kechishga majbur qilish, barcha isroillik garovdagilarni ozod etish, G‘azoni to‘liq qurolsiz hududga aylantirish va mintaqada hokimiyatni isroillik bo‘lmagan fuqarolik ma’muriyatiga topshirish nazarda tutilgan. Shuningdek, Isroil hukumati xavfsizlikni ta’minlash maqsadida G‘azo ustidan nazoratni o‘z zimmasiga oladi.
Netanyahu ta’kidlaganidek, G‘azo shahrini nazoratga olish urushni yakunlashning eng samarali yo‘li hisoblanadi. U boshlagan ishni oxiriga yetkazish va HAMASni mutlaqo yo‘q qilish zarurligini qayd etdi.
Bundan tashqari, G‘azo hududida xavfsiz yo‘laklar hamda yangi gumanitar yordam punktlarini tashkil etish rejalashtirilgan. Isroil rahbari maqsadlari G‘azoni egallash emas, balki uni ozod qilish ekanligini bildirdi.
Ushbu reja hududdagi vaziyatni tinchlik va barqarorlikka olib kelishga qaratilgan.
