ChatGPT tavsiyasi erkakning sog‘lig‘ini buzdi

Amerikalik bir erkak sun’iy intellekt — ChatGPT tavsiyalariga ishonib, sog‘lig‘iga jiddiy zarar yetkazdi. Bu haqida Zamin.uz xabar berdi.

U uch oy davomida oddiy tuz o‘rniga bromid moddasini iste’mol qilish haqida ko‘rsatma olgan. Natijada erkak paranoyya, gallyutsinatsiya va ruhiy bezovtalik bilan shifoxonaga yotqizildi, deb xabar beradi Annals of Internal Medicine jurnali.

Ma’lumotlarga ko‘ra, bemor shifoxonaga kelganida o‘z qo‘shnisining unga qasddan zahar berganiga ishonch bildirgan. Tekshiruvlar paytida uning qonida bromid moddasining xavfli darajada yuqori miqdori aniqlangan.

Shu sababli u psixiatriya bo‘limiga yotqizilib, uch haftalik majburiy davolanish kursini o‘tagan. Erkakning so‘zlariga ko‘ra, u sog‘lom turmush tarziga o‘tish maqsadida tuz iste’molini kamaytirishni xohlab, ChatGPT tavsiyalariga amal qilgan.

U internet orqali bromid sotib olib, uni kundalik ovqatiga qo‘shgan. Biroq sun’iy intellekt unga bromidning salomatlik uchun jiddiy xavf tug‘dirishi haqida ogohlantirmagan.

Vashington universiteti shifokorlari ta’kidlaganidek, bromid ilgari tibbiyotda qo‘llanilgan bo‘lsa-da, uning uzoq muddatli iste’moli zaharlanish va psixozga olib kelishi aniqlangach, tibbiy amaliyotdan chiqarilgan. Hozirda bu modda faqat ayrim veterinariya dorilarida qo‘llaniladi.

Ushbu voqea sun’iy intellektdan maslahat olishda ehtiyotkorlik zarurligini yana bir bor ko‘rsatdi. The Wall Street Journal nashrining yozishicha, so‘nggi paytlarda ChatGPT ba’zi foydalanuvchilarga hayoliy, hatto aqldan ozdiradigan tavsiyalar berishi kuzatilmoqda.

Ayrim hollarda u o‘zga sayyoraliklar bilan aloqalar yoki yaqin kelajakdagi apokalipsis haqida ham asossiz hikoyalar yaratadi. Tibbiyot mutaxassislari bu holatni «sun’iy intellekt psixozi» deb atay boshlagan.

Ya’ni chat-bot foydalanuvchining noto‘g‘ri fikrlarini va xayoliy tasavvurlarini kuchaytiradi. Ba’zilar esa bunday maslahatlar tufayli katta moliyaviy zarar ko‘radi yoki yaqinlari bilan munosabatlarini yo‘qotadi.

OpenAI kompaniyasi mazkur muammoni tan olib, sun’iy intellekt orqali shaxsiy va tibbiy masalalarda maslahat berishni cheklashga va’da berdi. Ammo mutaxassislar ta’kidlaydiki, bunday holatlardan to‘liq himoyalanish uchun insonlar sun’iy intellekt tavsiyalarini shubhasiz qabul qilmasligi va har doim malakali mutaxassis bilan maslahatlashishi zarur.