Ozarboyjon Ukrainaga 2 million dollar yordam beradi

Ozarboyjon prezidenti Ilhom Aliyev Ukrainaga insonparvarlik yordami ko‘rsatish to‘g‘risida muhim qaror qabul qildi. Bu haqida Zamin.uz xabar berdi.

Davlat rahbarining farmoyishiga muvofiq, Ukraina uchun 2 million dollar ajratiladi. Ushbu mablag‘lar Ozarboyjonda ishlab chiqarilgan zamonaviy elektr uskunalarini xarid qilish va ularni Ukraina hududiga yetkazib berish uchun sarflanadi.

Qaror 10 avgust kuni Aliyev va Ukraina prezidenti Volodimir Zelenskiy o‘rtasida telefon orqali bo‘lib o‘tgan suhbatdan so‘ng e’lon qilindi. Muloqot chog‘ida ikki davlat rahbarlari bir qator masalalarni muhokama qilib, ayniqsa Rossiyaning Ukraina hududidagi SOCAR neft bazasiga qilingan havo hujumlarini qat’iyan qoraladilar.

Shuningdek, Ukrainada joylashgan boshqa Ozarboyjon obyektlari va strategik ahamiyatga ega kompressor stansiyasining ham zarba ostida qolgani ta’kidlandi. Zelenskiy Rossiyaning Ukraina energetika infratuzilmasiga yo‘naltirilgan hujumlari haqida Aliyevga ma’lumot berganini bildirdi.

Unga ko‘ra, bu harakatlar nafaqat Ukraina, balki butun Yevropaning energiya xavfsizligiga tahdid soladi. Suhbat davomida Zelenskiy Ozarboyjon prezidenti Aliyevni AQShning vositachiligi bilan Boku va Yerevan o‘rtasida erishilgan kelishuvlar bilan samimiy tabrikladi.

Ma’lumot uchun, 6 avgustga o‘tar kechasi Rossiya qo‘shinlari Odessa viloyatida joylashgan va Ozarboyjon gazini Yevropaga yetkazishda muhim ahamiyatga ega kompressor stansiyasiga havo zarbasi berdi. Bu hujumdan bir necha kun oldin Ukraina birinchi marta Trans-Bolqon yo‘lagi orqali Ozarboyjon gazini qabul qilgan edi.

8 avgustga o‘tar kechasi esa Rossiya dronlari Odessa viloyatidagi SOCAR neft bazasiga zarba berdi. Moskva va Boku o‘rtasidagi munosabatlar sovuqlashayotgan bir paytda, Ukraina va Ozarboyjon aloqalari sezilarli darajada mustahkamlanmoqda.

Ushbu keskinlikning sababi 2024 yil dekabrida sodir bo‘lgan voqea bilan bog‘liq. Azerbaijan Airlines yo‘lovchi samolyoti Grozniy osmonida Rossiya havo mudofaa tizimi tomonidan urib tushirilgan edi.

Aliyev bu voqea uchun Moskvadan uzr so‘rash va jabrlanganlar oilalariga tovon to‘lashni talab qildi, biroq Rossiya bu talabni rad etdi. Iyun oyida esa ikki davlat o‘rtasidagi diplomatik mojaro kuchaydi.

Yekaterinburgda 20 yil oldin sodir bo‘lgan qotillik ishi bo‘yicha Ozarboyjon diasporasi vakillaridan bir necha kishi hibsga olindi. Tergov jarayonida ikki figurant halok bo‘ldi.

Boku tomonidan o‘tkazilgan ekspertiza ularning o‘limi og‘ir jarohatlar sababli kelib chiqqanini tasdiqladi. Bunga javoban Ozarboyjonda narkotik kontrabandasi va kiberjinoyatlarda gumon qilingan 10 dan ortiq rossiyalik fuqarolar hibsga olindi.

Tergov davomida ularning kaltaklangani haqida xabarlar tarqaldi. Hozirda Ozarboyjonning Ukrainaga ko‘rsatayotgan yordami va Rossiyaning hujumlariga nisbatan keskin pozitsiyasi xalqaro maydonda katta e’tibor qozonmoqda.

Mutasaddilar bu harakatlarning ikki davlat o‘rtasidagi hamkorlikni mustahkamlash bilan birga, Ukraina uchun strategik energiya xavfsizligini ta’minlash yo‘lida muhim ahamiyatga ega ekanini ta’kidlashmoqda.