Rossiyada mehnat tanqisligini bartaraf etish maqsadida minglab shimoliy koreys ishchilari qurilish, zavod va ishlab chiqarish sohalarida og‘ir sharoitlarda mehnat qilishga majbur qilinmoqda. Bu haqida Zamin.uz xabar berdi.
Janubiy Koreya razvedkasining ma’lumotlariga ko‘ra, Rossiya Ukraina urushi sabab yuzaga kelgan mehnat yetishmovchiligini bartaraf etish uchun Shimoliy Koreyadan 50 minggacha ishchi jalb qilishni rejalashtirmoqda. 2024-yilda Rossiyaga 13 mingdan ortiq koreys ishchisi kiritilgan bo‘lib, ularning ko‘pchiligi “talaba vizasi” orqali olib kirilgan.
Bu esa BMT tomonidan qo‘yilgan taqiqni chetlab o‘tish usuli sifatida baholanmoqda. Qochib chiqqan ishchilar 18 soatdan ortiq ishlashga, yil davomida faqat ikki kun dam olishga majbur bo‘lganini, sovuq va nosoz turar joylarda yashashga majbur ekanliklarini bildirgan.
Ular Shimoliy Koreya xavfsizlik xodimlari nazorati ostida bo‘lib, tashqariga chiqish imkoniyatlari deyarli yo‘q. Jarohatlanganlar ham ishlashga majbur qilingan holatlar mavjud.
Mutaxassislarning fikricha, bu tizim Shimoliy Koreya uchun katta moliyaviy manba hisoblanadi. Ishchilarning asosiy daromadi Pxenyanga yuboriladi, ularga esa oyiga atigi 100-200 AQSh dollari qoldiriladi.
Ushbu pullar vatanga qaytgach beriladi, bu esa qochish imkoniyatlarini yanada kamaytiradi. Janubiy Koreya manbalariga ko‘ra, Rossiyadan qochib kelayotgan ishchilar soni kamaymoqda: agar 2022-yilda bu raqam 20 kishini tashkil qilgan bo‘lsa, 2024-yilda 10 nafarga tushgan.
Kuzatuvchilar ikki davlat o‘rtasidagi siyosiy yaqinlashuv natijasida bu holat yanada kuchayishi mumkinligini ta’kidlamoqda.
