Hindistonda saylovlarda soxtalashtirish ayblovi ko‘tarildi
Hindistonda muxolifat partiyalari 2024-yilgi umumxalq saylovlari jarayonida saylov komissiyasining adolatsizligi haqida shikoyat qilmoqda. Bu haqida Zamin.uz xabar berdi.
Ularning fikriga ko‘ra, saylovda ovozlar soxtalashtirilgani va boshqa qonunbuzarliklar yuz bergan. Parlamentda muxolifat a’zolari saylov tizimiga oid masalalarni muhokama qilishni talab qilganida majlis to‘xtatib qo‘yilgan.
Muxolifat yetakchisi Rahul Gandi saylov komissiyasining ma’lumotlariga tayanib, ovoz beruvchilar ro‘yxatida yuz minglab soxta yoki takroriy yozuvlar mavjudligini ma’lum qildi. U ayrim hududlarda bir joyda o‘nlab, hatto yuzlab odamlarning ro‘yxatdan o‘tkazilganini ta’kidladi.
Bundan tashqari, saylov uchastkalaridagi video yozuvlar o‘chirib yuborilgani haqida ham gapirdi. Saylov komissiyasi va hukmron Bharatiya Janata partiyasi bu ayblovlarni asossiz deb rad etdi.
Komissiya Gandining o‘z iddialarini isbotlash yoki jamoatchilik oldida uzr so‘rashini talab qildi. Hukumat vakillari esa muxolifatni demokratik institutlarga putur yetkazishda ayblamoqda.
Iyunda boshlangan tekshiruv davomida 6,5 million nom ro‘yxatdan chiqarilgan. Komissiya bunga takroriy yozuvlar, vafot etgan shaxslar va boshqa hududlarga ko‘chib ketganlar sabab bo‘lganini bildiradi.
Tanqidchilar esa saylovchilar, xususan migrantlar va ozchilik vakillari nohaq ro‘yxatdan chiqarilganini ta’kidlamoqda. Hindiston Oliy sudi hozircha keng ko‘lamli ovoz beruvchilarni ro‘yxatdan chiqarish bo‘yicha dalillar yetarli emasligini bildirgan, ammo agar bunday holat isbotlansa, tezkor choralar ko‘rilishini ma’lum qilgan.
