Turkiyada yirik kiberjinoyat ishi bo‘yicha ayblov e’lon qilindi
Turkiya huquq-tartibot organlari mamlakatdagi eng yirik kiberjinoyat ishlaridan biri bo‘yicha muhim ayblovni e’lon qildi. Bu haqida Zamin.uz xabar berdi.
Prokuratura ma’lumotlariga ko‘ra, bir guruh yoshlar hukumatning maxfiy ma’lumotlar bazalariga noqonuniy kirib, davlat arboblariga oid shaxsiy ma’lumotlarni o‘g‘irlagan va sotgan. Ayblovda 20 nafar shaxs ishtirok etgani aytilmoqda, ularning 13 nafari jinoyat sodir etilgan 2021 yilda voyaga yetmagan bo‘lgan.
Tergov natijalariga ko‘ra, hakerlar Ichki ishlar, Sog‘liqni saqlash, Ta’lim vazirliklari, shuningdek, sug‘urta kompaniyalari va shahar hokimliklariga tegishli onlayn platformalarni buzib kirgan. Jinoyatchilar o‘g‘irlangan ma’lumotlardan elektron hujjatlarni qalbakilashtirish va keyinchalik sotishda foydalangan.
Tayyorlab sotilgan hujjatlar orasida akademik ma’lumotnomalar, politsiya ma’lumotlari, ko‘chmas mulkka oid hujjatlar hamda dori-darmon retseptlari mavjud bo‘lgan. Tergov materiallariga ko‘ra, hakerlar prezident Rajab Toyyib Erdo‘g‘anning haqiqiy 11 xonali identifikatsiya raqami va bir nechta vazirlarning shaxsiy ma’lumotlarini ham qo‘lga kiritgan.
Ular mijozlarga internet orqali turli kasallik varaqalari va boshqa rasmiy hujjatlarni tayyorlab berishni taklif qilgan. Ma’lumotlar bazasidagi o‘g‘irlik 2021 yilda aniqlangan va 2022 yil aprelidan boshlab politsiya hamda prokuratura gumonlanuvchilarni qo‘lga olish bo‘yicha amaliyotlarni boshlagan.
Yaqinda rasmiy ayblov e’lon qilinib, ish sudga taqdim etildi. Agar ayblar isbotlansa, ishtirokchilar 15 yilgacha ozodlikdan mahrum qilinishi mumkin.
Turkiyada ilgari ham yuqori martabali davlat arboblarining ma’lumotlarini o‘g‘irlash holatlari kuzatilgan. Masalan, 2016 yilda noma’lum shaxslar 50 ming fuqaroning, jumladan prezident haqidagi shaxsiy ma’lumotlarni ochiq e’lon qilgan.
O‘sha paytda jinoyatchilar harakatlari bevosita prezidentga qarshi qaratilganini iddao qilgan. Bu holatlar davlat xavfsizligi va shaxsiy ma’lumotlarni himoya qilish masalalarining qanchalik dolzarb ekanligini ko‘rsatadi.
