2028 yilda Samarqand IAC kosmik anjumaniga mezbonlik qiladi
2028 yilda Samarqand shahri xalqaro miqyosdagi eng yirik kosmik anjumanlardan biri bo‘lmish International Astronautical Congress (IAC)ga mezbonlik qilishi mumkin. Bu haqida Zamin.uz xabar berdi.
Agar ushbu reja amalga oshsa, dunyoning yetakchi kosmik sanoati vakillari, ilmiy markazlar, yirik agentliklar va startaplar mamlakatimizda birlashadi. Har yili IAC anjumanida taxminan 10 mingga yaqin ishtirokchi qatnashadi.
Ular orasida xalqaro kosmik agentliklar, ilmiy-tadqiqot institutlari, texnologik kompaniyalar va startaplar mavjud. Oldingi yillarda ushbu anjuman Boku (2023), Milan (2024), Parij (2022), Dubay (2021), Vashington (2019), Bremen (2018) va Adelaida (2017) shaharlarida o‘tkazilgan.
Masalan, Parijdagi IAC-2022 Fransiyaning global kosmik sohadagi mavqeini mustahkamladi, Avstraliyadagi 2017 yilgi anjumandan so‘ng esa mamlakatda kosmik agentlik tashkil etilgan. O‘zbekiston nomzodi sifatida Uzcosmos vakillari 2028 yilgi anjumani Samarqandda o‘tkazish taklifini rasmiy tarzda ilgari surdi.
Agar bu amalga oshsa, mamlakatimiz xalqaro hamkorlikni kengaytirish, qo‘shma ilmiy tadqiqotlar va startaplar uchun yangi imkoniyatlar eshigini ochadi. Shuningdek, ilmiy markazlar, texnoparklar va inkubatorlar qurilishi uchun xorijiy investorlarni jalb qilish imkoniyati paydo bo‘ladi.
Tayyorgarlik jarayonida Xalqaro Astronavtika Federatsiyasi ijrochi direktori Kristian Fayxtinger Samarqand va Toshkent shaharlarida bo‘lib, infratuzilma, moddiy-texnik baza, transport va mehmonxona tizimini o‘rgandi. Shuningdek, xavfsizlik choralari hamda ijtimoiy tadbirlar uchun sharoitlar baholandi.
Shu bilan birga, Ilon Mask IAC anjumanlarida maxsus mehmon sifatida bir necha bor qatnashgan va o‘zining muvaffaqiyatli kosmik loyihalarini taqdim etgan. Agar 2028 yilda anjuman Samarqandda o‘tkazilsa, uning shaxsan ishtirok etishi ehtimoli mavjud, ammo hozircha bu rasmiy tasdiqlanmagan.
