Rossiyada Telegram va WhatsAppda ovozli qo‘ng‘iroqlar cheklandi

Rossiyada Telegram va WhatsApp messenjerlarida ovozli qo‘ng‘iroqlarga qisman cheklovlar joriy etildi. Bu haqida Zamin.uz xabar berdi.

Bu haqda Rossiya Aloqa, axborot texnologiyalari va ommaviy axborot vositalarini nazorat qilish federal xizmati, ya’ni Roskomnadzor ma’lum qildi. Tashkilotning aytishicha, ushbu choralar jinoyatchilikka qarshi kurashish va fuqarolarning ko‘plab murojaatlaridan so‘ng qabul qilingan.

So‘nggi paytlarda firibgarlik va xavfli chaqiriqlar aynan ovozli qo‘ng‘iroqlar orqali ko‘paygan. Roskomnadzor ma’lumotiga ko‘ra, bu messenjerlar orqali fuqarolarni aldash, pul undirib olish, shuningdek, diversiya va terrorchilik harakatlariga jalb qilish holatlari ko‘p uchramoqda.

Shu sababli Telegram va WhatsApp egalariga jinoyatchilikka qarshi chora ko‘rish bo‘yicha bir necha marta talablar yuborilgan, ammo ular bajarilmagan. Natijada, cheklovlar faqat ovozli qo‘ng‘iroqlarga taalluqli bo‘lib, matnli xabarlar, fayl yuborish kabi boshqa funksiyalar ishlashda davom etadi.

Bundan tashqari, 2024 yildan boshlab Rossiyada “Antifrod” tizimi orqali raqamni soxtalashtirish asosida qilingan qo‘ng‘iroqlar operatorlar tomonidan bloklanmoqda. Ammo shu paytda xavfsizlik talablariga javob bermaydigan messenjerlar orqali qo‘ng‘iroqlar soni oshgani qayd etilgan.

WhatsApp matbuot xizmati end-to-end shifrlash tizimi haqida ma’lumot berib, bu tizim ma’lumotni faqat yuboruvchi va qabul qiluvchi o‘qishi uchun mo‘ljallanganini, shuningdek, hukumatlarning xavfsiz muloqotni buzishga urinishlariga qarshi turishini ta’kidladi. Shu bois, Rossiya hukumati mamlakatdagi yuz milliondan ortiq foydalanuvchilar uchun cheklov joriy etishga harakat qilmoqda.

Telegram matbuot xizmati esa platformaning zararli faoliyatga qarshi faol kurashayotganini ma’lum qildi. Ular sun’iy intellekt vositalari yordamida ochiq kanallarni nazorat qilish, har kuni millionlab zararli xabarlarni o‘chirish va qo‘ng‘iroqlar uchun maxfiylik sozlamalarini joriy qilish orqali foydalanuvchilar xavfsizligini ta’minlashga harakat qilmoqda.

Shuningdek, 11 avgust kuni Downdetector xizmatining ma’lumotlariga ko‘ra, WhatsApp va Telegramda keng ko‘lamli texnik nosozliklar yuzaga kelgan. Rossiya foydalanuvchilari tomonidan kelgan shikoyatlar soni 10 avgustdan beri keskin ko‘paygan va aksariyati videoqo‘ng‘iroqlar paytidagi aloqa uzilishlariga taalluqli.

Rossiya Markaziy bankining 2025 yil fevral oyidagi statistik ma’lumotlariga ko‘ra, firibgarlik holatlarining 45,6 foizi mobil aloqa orqali, 15,7 foizi esa messenjerlar orqali sodir etilgan. Mutaxassislar fikricha, joriy etilgan cheklovlar ayrim xavfli sxemalarni to‘xtatishi mumkin, ammo foydalanuvchilarning kundalik muloqot erkinligiga salbiy ta’sir ko‘rsatishi ehtimoldan xoli emas.