Insta360 xodimlari vazn yo‘qotib pul topmoqda
Xitoyning yirik texnologiya kompaniyalaridan biri bo‘lgan Insta360 o‘z xodimlarini sog‘lom turmush tarziga rag‘batlantirish maqsadida noodatiy tashabbusni amalga oshirdi. Bu haqida Zamin.uz xabar berdi.
Shanghai City News Service ma’lumotiga ko‘ra, kompaniya “Oz va pul top” nomli chellenjni yo‘lga qo‘ydi. Ushbu loyihada vazn yo‘qotgan har bir xodim har 500 gramm uchun 500 yuan, ya’ni taxminan 70 dollar mukofot oladi.
Loyihaning o‘ziga xos jihati shundaki, agar xodim vazn orttirsa, har 500 gramm uchun 800 yuan jarima to‘lashi kerak bo‘ladi. Bu qoidalar xodimlarga nafaqat moliyaviy rag‘bat beradi, balki sog‘lig‘iga jiddiy e’tibor berishga sabab bo‘ladi.
Chellenjda ishtirok etgan 99 nafar xodim jami 950 kilogramm vazn yo‘qotishga erishdi va ular birgalikda 1 million yuan, ya’ni taxminan 139 ming dollar miqdorida mukofot oldi. Qiziqarli tomoni shundaki, hech kim jarima to‘lashga majbur bo‘lmadi.
Insta360 vakillari ta’kidlaganidek, bu tashabbusning asosiy maqsadi sog‘lom turmush tarzini targ‘ib qilish va ish joyida ijobiy muhit yaratishdir. Ijtimoiy tarmoqlarda ushbu loyiha katta qiziqish uyg‘otdi.
Ko‘plab foydalanuvchilar o‘z ish joylarida ham shunday dasturlarni joriy etishni taklif qilishmoqda. Shunga o‘xshash loyiha avvalroq Guangdongdagi Wonderlab kompaniyasida ham amalga oshirilgan edi.
U yerda bir oylik vazn yo‘qotish tanlovi natijasida 224 xodim jami 750 kilogrammgacha vazn yo‘qotdi va jami 171 ming yuan mukofot puli taqsimlandi. Eng yaxshi natijani ko‘rsatgan ishtirokchi 16,4 kilogramm vazn yo‘qotib, 7600 yuan mukofot olgan.
Mazkur dasturlar Xitoy Sog‘liqni saqlash milliy komissiyasining vaznni nazorat qilish va semirishga qarshi kurash bo‘yicha uch yillik strategiyasiga mos keladi. Milliy statistika ma’lumotlariga ko‘ra, 2023 yilda mamlakatdagi katta yoshli aholining 57 foizida ortiqcha vazn yoki semizlik aniqlangan.
Bu ko‘rsatkich 2018 yilda 51 foiz, 2013 yilda esa 46 foiz bo‘lgan. Agar samarali choralar ko‘rilmasa, 2030 yilga kelib bu raqam 65 foizga yetishi mumkin.
Shu bilan birga, semizlik bilan bog‘liq tibbiy xarajatlar 418 milliard yuangacha ko‘tarilishi va umumiy sog‘liqni saqlash xarajatlarining 22 foizini tashkil etishi taxmin qilinmoqda.
