Insta360 xodimlari vazn tashlab, million yutdi
Xitoyning janubiy Guandun provinsiyasida joylashgan Insta360 kompaniyasi o‘z xodimlari uchun noyob va motivatsion aksiyani yo‘lga qo‘ydi. Bu haqida Zamin.uz xabar berdi.
“Ozing va pul ishlang” deb nomlangan ushbu dasturda ishtirok etish qoidalari juda sodda: har bir yo‘qotilgan 500 gramm vazn uchun rahbariyat 500 yuan (taxminan 70 dollar) mukofot beradi. Shu bilan birga, tizim ikki tomonlama ishlaydi — agar xodim vazn orttirsa, har bir qo‘shilgan 500 gramm uchun 800 yuan (112 dollar) jarima to‘laydi.
Qiziq tomoni shundaki, hozirgacha hech kim jarimaga tortilmagan. Aksiyaga 99 nafar xodim qo‘shilib, jami 950 kilogramm vazn tashlashdi va 1 million yuandan ortiq mukofot oldilar.
Kompaniya rahbariyatining ta’kidlashicha, bu dasturning maqsadi faqat vazn kamaytirish emas, balki sog‘lom hayot tarzini targ‘ib qilish va ish joyida ijobiy muhit yaratishdir. Ushbu tashabbus ijtimoiy tarmoqlarda keng muhokama qilindi va ko‘plab foydalanuvchilar o‘z kompaniyalarida ham shunday loyihalar tashkil etilishini istashlarini bildirishdi.
Avvalroq Guandundagi Wonderlab kompaniyasi ham bir oylik vazn yo‘qotish tanlovini o‘tkazgan edi. Unda 224 kishi ishtirok etib, jami 750 kilogramm vazn yo‘qotgan va 171 ming yuan mukofotni bo‘lishgan.
Tanlovda eng yaxshi natijani qayd etgan ishtirokchi 16,4 kilogramm vazn tashlab, 7600 yuan yutgan. Mutaxassislar ta’kidicha, bunday loyihalar Xitoy Milliy sog‘liqni saqlash komissiyasining vazn nazorati va semirishga qarshi kurash dasturiga mos keladi.
Milliy statistikaga ko‘ra, 2023 yilda mamlakatdagi kattalarning 57 foizi ortiqcha vazn yoki semizlikdan aziyat chekmoqda. Agar zarur choralar ko‘rilmasa, 2030 yilga borib bu ko‘rsatkich 65 foizga yetishi mumkin va bu sog‘liqni saqlash xarajatlarini sezilarli darajada oshiradi.
Shu sababli kompaniyalar tomonidan bunday tashabbuslar salomatlikni saqlash va kasalliklarning oldini olishda muhim o‘rin tutadi.
